Sara Rún riftir samningi sínum á Spáni

AE Sedis Bàsquet staðfesti þetta á samfélagsmiðlum sínum fyrr í dag. Þar var henni óskað góðs gengis í framtíðinni og sagt að um sameiginlega ákvörðun milli félags og leikmanns væri að ræða.

Sara Rún gekk í raðir AE Sedis Bàsquet um mitt síðasta ár og spilaði vel áður en hún meiddist. Þrátt fyrir að hafa náð sér af meiðslunum hefur hún lítið spilað undanfarið og fékk því samningi sínum rift.

Hin 27 ára gamla Sara Rún er uppalin í Keflavík en hefur einnig spilað með Haukum hér á landi, í bandaríska háskólaboltanum, á Englandi, á Ítalíu, í Rúmeníu sem og á Spáni. Hvað tekur við að svo stöddu er ekki víst.