Ármann tryggðu sér þriðja sætið með sigri gegn Young Prodigies

Snorri Már Vagnsson skrifar 15. febrúar 2024 21:36

(f.v.) Arnar "Vargur" Hólm, Ólafur "Ofvirkur" Barði og Guðbjartur "Guddi" Þorkell.

Ármann sigruðu lið Young Prodigies í Ljósleiðaradeildinni í Counter-Strike í kvöld. Ármann eru nú búnir að tryggja sér þriðja sætið, en Saga, sem er í fjórða sæti, á ekki lengur séns á að ná þeim.

Upphaf leiks einkenndist af tæknilegum vandamálum hjá Ármanni, þar sem Hundzi virtist eiga í vandræðum með leikjamús sína. Milli þess sem Ármann tóku tæknilegar pásur sigruðu Young Prodigies upphafsloturnar og komust í 3-0 áður en Ármann sigruðu sína fyrstu lotu.

Eftir að greiða úr tæknilegum örðugleikum náðu Ármann að koma sér inn í leikinn að nýju og í tíundu lotu jöfnuðu þeir leikinn í 5-5 eftir að hafa verið undir fram að því. Í kjölfarið tóku þeir forystuna, 5-6. Young Prodigies sigruðu síðustu lotu hálfleiks og fóru liðin því jöfn til hálfleiks.

Staðan í hálfleik: Young Prodigies 6-6 Ármann

Ármann hófu seinni hálfleik vel og komust í 6-8 en Young Prodigies náðu forystunni að nýju með fjórum sigrum í röð, 10-8. Fljótt fór þó undan fæti að halla hjá ungu liði Young Prodigies, en Ármann sigruðu lotur trekk í trekk og raunar sigruðu þeir allar loturnar sem eftir voru af leiknum.

Lokatölur: Young Prodigies 10-13 Ármann

Ármann hafa því, eins og kom áður fram, tryggt sér þriðja sæti Ljósleiðaradeildarinnar á þessu tímabili. Young Prodigies munu svo spila úrslitaleik um sjötta sæti gegn FH á laugardaginn, en liðin eru jöfn í 6-7 sæti með 16 stig hvort.

Rafíþróttir Ljósleiðaradeildin