Ómar í stuði með Mag­deburg en Kol­stad tapaði stórt á heima­velli

Magdeburg var í heimsókn hjá Celje Lasko í Slóveníu en fyrir leikinn var Magdeburg í öðru sæti B-riðils en slóvenska liðið neðst án stiga.

Enda var það Magdeburg sem var sterkari aðilinn í kvöld. Leikurinn var reyndar jafn til að byrja með en um miðjan síðari hálfleikinn náði Magdeburg þriggja marka forystu og munurinn var orðinn sex mörk að loknum fyrri hálfleik. Staðan þá 18-12.

Munurinn fór mest upp í sjö mörk í upphafi síðari hálfleik en þá tóku heimamenn í Celje Lasko aðeins við sér. Þeir breyttu stöðunni úr 21-14 í 23-21 og spenna hlaupin í leikin. Hún stóð þó ekki lengi yfir. Gestirnir náðu 8-1 kafla og tryggðu sér öruggan sigur. Lokatölur 37-27.

Ómar Ingi Magnússon var markahæstur ásamt Lukas Mertens í liði Magdeburg en hann skoraði átta mörk úr ellefu skotum. Gísli Þorgeir Kristjánsson sneri aftur eftir meiðsli og skoraði eitt mark en Janus Daði Smárason var ekki með Magdeburg í kvöld.

Kolstad tekið í kennslustund í Noregi

Í Noregi tók heimalið Kolstad á móti HC Zagreb frá Króatíu en liðin voru hlið við hlið í töflunni fyrir leikinn í 6. -7. sæti A-riðils. Gestirnir sýndu þó nokkra yfirburði í kvöld. Þeir náðu tíu marka forystu í fyrri hálfleik og lið Kolstad í algjöru basli.

Staðan í hálfleik var 18-10 og heimamenn náðu lítið sem ekkert að minnka muninn í síðari hálfleiknum. Minnstur varð munurinn fimm mörk þegar tæpar tíu mínútur voru eftir en gestirnir frá Króatíu bættu þá bara í á nýjan leik.

Lokatölur 34-25 og Kolstad því áfram með níu stig í næst neðsta sæti riðilsins. Sigvaldi Björn Guðjónsson skoraði fjögur mörk úr níu skotum fyrir Kolstad í leiknum.