Mark­miðin góð í fjölmiðlastefnu en segir fjár­hæð styrkja of lága

Fjölmiðlastefnan er til ársins 2030 en drögin hafa verið birt í samráðsgátt stjórnvalda og miða m.a. að því að efla fjölbreytni, fagmennsku og rekstur innlendra fjölmiðla. Sigríður Dögg Auðunsdóttir, formaður Blaðamannafélagsins, fagnar þessu skrefi en finnst um leið umhugsunarvert að fjölmiðlastefna hafi ekki þegar verið í gildi.

„Það hefur alltaf verið tekið sem sjálfsögðum hlut að hér séu frjálsir fjölmiðlar og að tjáningarfrelsi sé virt og að það þurfi ekki að gera neitt mikið til þess að passa upp á það en það er bara alls ekki þannig. Við sjáum það bara í kringum okkur að þar sem er ekki passað upp á fjölmiðlafrelsið þá fjarar undan því,“ segir Sigríður Dögg.

Lægri ritstjórnarkostnaður

Í drögunum eru settar fram 29 skilgreindar aðgerðir til að stuðla að fjölmiðlastefnunni. Ein þeirra er að veita einkareknum fjölmiðlum tímabundna undanþágu frá greiðslu 70% tryggingagjalds af launum fjölmiðlafólks. Sigríður segir þennan lið aðgerðaáætlunarinnar vera fagnaðarefni en kallar eftir því að prósentutalan verði hækkuð.

Í drögum að fjölmiðlastefnunni er lagt til að opinberar stofnanir, sem verja meira en tíu milljónum árlega í auglýsingar, geri grein fyrir viðskiptunum. Sigríður Dögg vill ekki hafa neina viðmiðunarfjárhæð og að fullkomið gagnsæi ríki.

„Það ætti líka að setja skýrar reglur um að það eigi eingöngu að kaupa auglýsingar af þeim sem borga til samfélagsins; þeim sem borga hér skatta og gjöld.“

Stuðningskerfi að norrænni fyrirmynd fest í sessi

Í fjölmiðlastefnudrögunum segir að áfram verði stutt við rekstur einkarekinna fjölmiðla með stuðningskerfi að norrænni fyrirmynd.

„Það er náttúrulega mjög áhugavert að sjá þarna samanburðinn á milli Norðurlandaþjóðanna en við erum í langfámennasta ríkinu með fámennistungumál og mestu samkeppnisskekkjuna en samt sem áður eru styrkir til einkarekinna miðla lægstir hér,“ segir Sigríður sem bætir við að styrkjakerfi til einkarekinna fjölmiðla sé ekki við lýði í Finnlandi.

Fyrirkomulag auglýsingamála RÚV enn of óljóst

Í skýrslu starfshóps um málefni Ríkisútvarpsins koma fram þrjár leiðir til breytinga og svokölluð stafræn leið talin ákjósanlegust en hún hefur verið kynnt í ríkisstjórn. Hún gerir ráð fyrir að hefðbundin sala á auglýsingum hjá stofnuninni verði óheimil en auglýsingahólf séu þess í stað seld á vefnum en að vefpantanir séu án aðkomu sölufólks. Sigríði finnst þessi angi málsins aðeins of óljós á þessu stingi máls.

„Ég sé ekki alveg hvernig það á að ganga upp. Mjög auðvelt að það komi þarna einhverjir milliliðir þarna inn á markaðinn og ég myndi vilja sjá betri útskýringar á því hvernig ráðherra hefur hugsað útfærslu á þessum hlutum.“