Körfubolti

Martin og Jón Axel skapandi á Spáni

Sindri Sverrisson skrifar
Martin Hermannsson með boltann gegn Baskonia í kvöld.
Martin Hermannsson með boltann gegn Baskonia í kvöld. Getty/Aitor Arrizabalaga

Martin Hermannsson og félagar í Alba Berlín urðu að sætta sig við enn eitt tapið í EuroLeague, sterkustu deildakeppni Evrópu, í kvöld. Þeir mættu Baskonia á Spáni og töpuðu 88-71. Jón Axel Guðmundsson spilaði einnig á Spáni í kvöld og fagnaði sigri.

Martin var með flestar stoðsendingar fyrir Alba Berlín í kvöld eða átta, stal boltanum þrisvar, skoraði þrjú stig og tók þrjú fráköst.

Heimamenn komust hins vegar í 23-10 í fyrsta leikhluta og voru átta stigum yfir í hálfleik, 42-34. Þeir byrjuðu seinni hálfleik einnig af krafti og náðu sextán stiga forskoti, 63-47.

Alba Berlín er neðst í EuroLeague með fimm sigra í 28 leikjum en Baskonia er í 8. sæti með fimmtán sigra.

Jón Axel öflugur á Alicante

Eins og fyrr segir var Jón Axel, félagi Martins úr íslenska landsliðinu, einnig að spila á Spáni í kvöld en það var í spænsku B-deildinni. Hann fagnaði sigri því lið hans Alicante vann Hestia Menorca 67-61.

Alicante er nú í 3. sæti með 39 stig, þremur stigum á eftir toppliði Leyma Coruna eftir 23 umferðir af 34. Ljóst að liðið er að minnsta kosti á leið í umspil um sæti í efstu deild en efsta liðið kemst beint upp.

Jón Axel var stoðsendingahæstur með fimm slíkar, skoraði níu stig og tók fimm fráköst.

Körfubolti Spænski körfuboltinn

Mest lesið


Fleiri fréttir

Sjá meira


×

Mest lesið