Var rekinn en hefndi sín: „Hefði verið búið að berja hann í spað“

Keflvíkingarnir Sævar Sævarsson og Jón Halldór Eðvaldsson voru sérfræðingar Körfuboltakvölds á föstudaginn síðastliðinn og þeir voru allt annað en ánægðir með varnarleik Keflavíkur í leiknum gegn ÍA og það hvernig þeim mistókst að stöðva Daryll Morsell, leikmann ÍA.

Keflvíkingar létu Darryl Morsell fara fyrr á tímabilinu þegar þeir sömdu við Remy Martin en hvert lið má aðeins vera með einn bandarískan leikmann. ÍA samdi í kjölfarið við Morsell og kaldhæðni örlaganna í leiknum upp á Skaga á fimmtudaginn reyndist síðan sú að Morsell átti frábæran leik en Remy Martin sat meiddur á bekknum. 

Morsell setti niður 36 stig í umræddum leik, tók 9 fráköst og gaf 5 stoðsendingar en sérfræðingar Körfuboltakvölds voru allt annað en sáttir með það hvernig Keflvíkingar vörðust gegn sínum gamla liðsfélaga.

„Það er nánast aldrei sett hendi upp á móti honum,“ sagði Sævar Sævarsson, einn af sérfræðingum Körfuboltakvölds. „Það er að koma þarna leikmaður sem er rekinn og þú færð ekkert meira högg fyrir sjálfstraustið heldur en þegar þú ert rekinn frá einu liði. Þú færð tækifæri hjá öðru liði og ert búinn að merkja það inn á dagatalið hvenær þú mætir þínu gamla liði svo þú getir sannað að þú sért alltof góður til þess að vera rekinn.“

Þetta hafi átt að vera leikurinn þar sem leikmenn Keflavíkur ættu að vera á tánum.

„Sýna honum að það sé ástæða fyrir því að hann hafi verið rekinn, sýna að þeir ætli gjörsamlega að kafsigla honum í þessum leik.“

Það gerðist hins vegar ekki.

„Hann fær dauðafrí skot. Sókn eftir sókn eftir sókn.“

Jón Halldór Eðvaldsson, annar af sérfræðingum Körfuboltakvölds lagði síðan sitt mat á stöðuna. Það vanti einfaldlega Keflvíkinga í lið Keflavíkur.

„Ef það væru Keflvíkingar í raun og veru verið að spila fyrir Keflavík í þessum leik. Þá hefði hann aldrei skorað 36 stig af því það hefði verið búið að berja hann í spað. Þarna ertu bara með samansafn af erlendum leikmönnum og aðkomumönnum sem skilja þetta ekki.“

Sævar tók ekki undir orð Jóns Halldórs.

„Ég ætla ekki að segja að þeim sé ekki sama.“