SA gæti gripið til verk­banns skelli verk­föll á Icelandair

Samninganefndir verslunarmanna og Samtaka atvinnulífsins áttu tólf klukkustunda langan fund hjá ríkissáttasemjara í gær, þar sem fulltrúar frá Icelandair tóku þátt í viðræðunum eftir hádegi. Aðalverkefnið er að ná kjarasamningi til fjögurra ára fyrir félagsmenn VR og Landsambands verslunarmanna.  VR sækir einnig breytingar á vaktafyrirkomulagi um 180 félagsmanna sem vinna hjá Icelandair á Keflavíkurflugvelli.

Samkvæmt heimildum fréttastofu var mikil spenna í viðræðunum í gær og mátu sumir stöðunna þannig að upp úr þeim gæti slitnað. Svo fór þó ekki og mættu samningsaðilar á ný til fundar klukkan tíu í morgun. Ragnar Þór Ingólfsson formaður VR kannast ekki við mikla spennu.

„Nei, ég geri það nú ekki. Við erum í kjaraviðræðum og þetta bara tekur tíma. Ég held að allir séu að reyna sitt besta til að loka þessu. Það er mitt mat á stöðunni.“

En þetta er augljóslega erfiðasta málið; þessi deila um vaktirnar uppi á Keflavík?

„Já, það er það. Þetta er heldur ekkert einfalt mál fyrir okkar viðsemjendur. Þannig að þetta er stærsta málið sem stendur út af borðinu,“ segir Ragnar Þór.

Það ætti að vera fljótlegt að ganga frá öðrum málum þótt reynslan sýndi, meðal annars í viðræðum annarra sem hafi samið að undanförnu, að ýmis mál geti tekið nokkurn tíma. Formaðurinn telur allar líkur á að röð verkfallsaðgerða verði samþykkt í yfirstandandi atkvæðagreiðslu.

„Ég tel allar líkur á því já. Þátttakan hefur verið með afburðum góð. Svona miðað við hvernig þátttakan hefur verið í atkvæðagreiðslunni sjálfri finnst mér það gefa vísbendingar um að verkfallsboðunin verði samþykkt,“ segir formaður VR.

Reynslan sýnir að jafnvel verkfallsboðun ein og sér getur valdið flugfélögum töluverðu tjóni sem síðan verður enn meira eftir að aðgerðir hefjast. Boðaðar aðgerðir VR yrðu á miklum annatíma Icelandair.

Fyrstu aðgerðirnar hæfust á miðnætti föstudagsins 22. mars og næðu til allrar helgarinnar fyrir páska. Í páskavikunni yrði verkfall daginn fyrir skírdag og á skírdag, á páskadag og á annan og þriðja í páskum. Síðan hæfist fimm daga verkfall frá föstudeginum 5. apríl, helgina eftir páska. Að lokum hæfist ótímabundið verkfall föstudaginn 12. apríl.

„Kostnaðurinn við að lagfæra það sem þarf að lagfæra er brotabrot við þann kostnað sem verkföll geta mögulega kostað félagið,“ sagði Ragnar Þór Ingólfsson.

Ef verkföll verða samþykkt og ekkert miðar í samningaviðræðum er ekki útilokað að Samtök atvinnulífsins grípti til verkbanns á að minnsta kosti hluta ef ekki alla starfsmenn VR sem þá yrðu launalausir. Slíkum aðgerðum var eftirminnilega hótað í deilu Eflingar og SA í byrjun síðasta árs.