Góð á­skorun að smakka 17 kokteila sama kvöldið

„Hátíðin er í fyrsta sinn í Hörpu. Þetta er eitthvað sem áhugafólk um kokteila og vín vill ekki missa af,“ segir Teitur Riddermann Schiöth forseti Barþjónaklúbbs Íslands sem skipuleggur hátíðina.

Auk Íslandsmeistaramótsins fer í Flóa í kvöld fram kynning frá vínbirgjum. Kaupa þarf miða á viðburðinn en með hverjum miða fylgja um tíu drykkjarmiðar.

„Tíu drykkjarmiðar ættu að vera feykinóg en með þeim getur fólk gengið á milli og smakkað það sem er í boði. Seinna meir verður svo hægt að smakka sigurkokteilinn,“ segir Teitur.

Vínbirgjarnir eru flestir með sýningar á sínum vörum í kokteilaformi en svo verða einnig birgjar með til sýnis allskonar kokteilavörur.

„Þetta verða aðallega drykkir og kokteilar,“ segir Teitur og til að blanda þá verði barþjónar sem starfa á börum í bænum.

Hefja Íslandsmótið í kvöld

Alls taka um 37 þátt í Íslandsmeistaramóti barþjóna.

„Forkeppnin fer fram upp á sviði í Hörpu. Það er keppt í klassískri kokteilagerð og er í raun keppt í tveimur flokkum. Annars vegar eiga þau að gera kokteil með lágri áfengisprósentu og hins vegar freyðandi kokteil þar sem þeir þurfa að nota í það minnsta sjö sentilítra af freyðivíni.“

Hver barþjónn þarf í keppninni að segja frá kokteilnum og innblæstri að honum og fær mínútu til þess. Eftir það fær hann sjö mínútur til að gera fimm kokteila. Einn fer á sýningarborð og fjórir til dómnefndar sem smakkar.

„Keppendur eru líka dæmdir fyrir fagleg vinnubrögð,“ segir Teitur.

Hann segir að keppendum sé skipt í holl. Þrír blandi á sama tíma upp á sviði og það geti tvö þriggja manna teymi verið upp á sviði hverju sinni.

„Þannig náum við vonandi að klára fyrir klukkan ellefu,“ segir Teitur léttur og að fimm komist í úrslit í Barþjónakeppninni sem fer fram á sunnudaginn. 

Áskorun að smakka 17 kokteila 

Á morgun fara svo tvær dómnefndir á vegum hátíðarinnar í göngu á milli allra staðanna sem taka þátt í hátíðinni. Alls eru það 33 barir en á hverjum og einum er sérstakur kokteilaseðill sem er í gangi alla helgina.

„Við löbbum á alla 33 staðina og smökkum einn kokteil sem þau hafa valið sem keppniskokteil. Eftir það, þegar við erum búin að smakka, veljum við fimm bestu kokteilana og þeir keppa svo líka í úrslitum á sunnudaginn, ásamt þeim fimm sem komast í úrslit í Íslandsmótinu.“

En hvað er eiginlega trikkið við það að smakka 33 kokteila og enda ekki hauslaus?

„Þú þarft að vera „pró“. Oftast er þetta fólk sem hefur gert þetta áður. Þetta er auðvitað skemmtilegt vinna en við skiptum þessu niður í tvær dómnefndir þannig það sé ekki sama dómnefndin að smakka alla kokteilana. Það væri frekar mikið. Þannig þetta eru kannski 16 á hverju dómnefnd. Þetta tekur auðvitað á en fólk klárar yfirleitt ekki kokteilana og jafnvel bara spýtir þeim út. Til að vera ekki alveg farin í seinasta kokteilum.“

Teitur hefur sjálfur starfað lengi sem barþjónn og þekkir bransann afar vel. Hann segir vinsælustu kokteilana í dag líklega vera Whiskey Sour, Basil gimlet, Espresso Martini og Pick me Up.

„Moscow Mule hefur verið að koma sterkur inn en ég veit ekki hvort hann gæti mögulega verið dottinn úr tísku. Mojito-æðið er eiginlega alveg búið því það er svo margt spennandi að koma inn.“

Hver er þinn uppáhalds?

„Það er Negroni sem er kannski svona fyrir lengra komna. Það eru jöfn hlutföll af gini, sætum Vermouth og Campari. Hann er beiskur og sterkur og rífur aðeins í, en ég elska hann.“

Hvað varðar séríslenska kokteila segir Teitur að það hafi ekki verið mikið nýlega en nefnir sem dæmi Miðnes sem er gin og tónik með miklu meira gini en tónik. Svo er muldur ís með.

Brennivín gott í kokteila

„Svo eru brennivínskokteilar skemmtilegar,“ segir Teitur og að þótt svo að það sé kannski ekki vínið sem komi fyrst upp í hugann við kokteilagerð sé það prýðilegt í það.

„Þetta er gæðavara. Hlutlaus spíri með kúmeni sem er hægt að nota í kokteila. Ég gerði einn 2016 sem ég skírði Svartafell,“ segir Teitur en í honum var brennivín, hindberjasíríp, sítrónusafi, rjómi og Montenegro Ammarro og sítrónu- og limebörkur rifinn yfir.

„Ég vann árangri með hann því ég vann gömlu Brennivínskeppnina,“ segir Teitur og að það hafi vakið mikla athygli í keppninni að hann hafi notað vatnsbyssur til að sprauta víninu í glösin.

Teitur hvetur alla sem hafa áhuga á kokteilum til að kíkja á keppnina eða staðina til að smakka þá kokteila sem hafa verið búnir til fyrir hátíðina.

„Kokteilar snúast um að hafa gaman. Það er allt gott í hófi,“ segir hann og hvetur gesti hátíðarinnar til að smakka fjölbreytta og nýja kokteila.

„Staðirnir sjálfir eru að búa til koktteila sem eru kannski ekki jafn vel þekktir og þessir klassísku. Það eru allir helstu kokteilabarir Reykjavíkur með og kokteilaseðlarnir eru mjög vel heppnaður. „Standardinn“ er orðinn miklu meiri en bara þegar ég bar að byrja fyrir tíu árum.“

Hægt er að kynna sér alla dagskrá hátíðarinnar á heimasíðu hennar RCW.is. Síðan er hönnuð fyrir farsíma.