Yrði „al­gjör niður­læging fyrir Fram­sóknar­menn og Sjálf­stæðis­menn“

Þetta segir Vilhjálmur í samtali við Morgunblaðið, þar sem haft er eftir honum að hann hafi þungar áhyggjur af því að nýr matvælaráðherra, Bjarkey Olsen Gunnarsdóttir, muni hafa sömu afstöðu og forveri hennar, Svandís Svavarsdóttir, til veiðanna og hafna umleitan Hvals um heimild til veiða.

„Það ligg­ur fyr­ir sam­kvæmt mín­um upp­lýs­ing­um að Hval­ur hf. skilaði inn er­indi til mat­vælaráðuneyt­is­ins í janú­ar. Það tók ráðuneytið einn og hálf­an mánuð að svara því og þar var óskað eft­ir út­skýr­ing­um og öðru slíku. Hval­ur svaraði því fyr­ir páska og hef­ur ekk­ert svar fengið um það hvort veiðar verði heim­ilaðar í sum­ar eða ekki,“ segir Vilhjálmur.

Hann segist ekki trúa öðru en að Framsóknarmenn og Sjálfstæðismenn, sem hafi haft „mjög hátt“ þegar Svandís frestaði veiðum og lýst stuðningi sínum við hvalveiðar, hafi tryggt í nýjum málefnasamningi að veiðarnar yrðu heimilaðar.

„Ef ekki þá yrði það algjör niðurlæging fyrir Framsóknarmenn og Sjálfstæðismenn. Algjör,“ segir Vilhjálmur.

Haft er eftir Jóni Gunnarssyni, þingmanni Sjálfstæðisflokksins, að hann trúi ekki öðru en að nýr matvælaráðherra heimili veiðarnar en Bjarkey vildi ekki tjá sig um málið í gær að öðru leyti en að hún ætti eftir að taka formlega við matvælaráðuneytinu og funda með starfsfólki þess.