Rowling enn bitur út í Harry Potter-stjörnurnar

Stjörnur Hollywood-myndanna um Harry Potter, þau Daniel Radcliffe og Emma Watson, lýstu yfir stuðningi við trans konur eftir að Rowling skrifaði grein gegn réttindum trans fólks árið 2020. Í greininni sakaði rithöfundurinn trans fólk um að grafa undan konum og veita „rándýrum“ skjól.  Með rándýrum átti hún við karlmenn sem hún ímyndaði sér að létust vera konur í því skyni að ráðast á þær.

Síðan þá hefur Rowling haldið áfram að fara mikinn um trans fólk þrátt fyrir að það hafi gert fjölda aðdáenda bóka hennar afhuga henni og að hún hafi ítrekað verið sökuð um fordóma gegn trans fólki.

Breski rithöfundurinn hélt enn áfram að deila efni sem tengist trans fólki á samfélagsmiðlinum X í gær. Svar hennar til notanda sem sagðist öruggur um að hún fyrirgæfi Radcliffe og Watson ef þau bæðu hana afsökunar bendir til þess að hún sé enn bitur út í leikarana fyrir lýsa gagnstæðri skoðun á sínum tíma.

„Ekki öruggt, er ég hrædd um,“ svaraði Rowling sem sakaði leikarana um að halla sér að hreyfingu sem ætlaði sér að grafa undan réttindum kvenna og ýjaði enn að því að konum stafaði hætta af trans fólki.

Sjón er á meðal annarra rithöfunda sem hafa gagnrýnt Rowling fyrir orðræðu hennar í garð trans fólks. Í tísti í fyrra sakaði íslenski rithöfundurinn hana um að afmennska trans fólk kerfisbundið.