Heimir Guð­jóns og Óskar Hrafn hafa báðir látið Hall­grím heyra það

Í fyrrasumar fékk Hallgrímur að heyra það frá Óskari Hrafni Þorvaldssyni, þáverandi þjálfara Breiðabliks, og um helgina fékk Hallgrímur að heyra það frá Heimi Guðjónssyni, þjálfara FH. Báðir voru allt annað en sáttir með hinn 38 ára gamla þjálfara Akureyrarliðsins.

Í bæði skiptin fóru leikirnir fram á Greifavellinum, nýja gervigrasvelli KA-manna á KA-svæðinu. Myndatökuvélinn og hljóðneminn er fyrir ofan varamannabekki liðsins og því heyrist oft betur en vanalega hvað fer á milli manna í hita leiksins.

Stúkan klippti saman reiðilesturinn hjá bæði Heimi og Óskari Hrafni. Fyrsti heyrum við í Heimi en hann endaði með að fá gula spjaldið frá dómara leiksins. Svo strax á eftir má heyra í Óskari Hrafni.

„Ertu að f-g djóka þarna. Þú ert búinn að rífa kjaft allan leikinn maður. Búinn að vera að góla á mig og ég er ekki búinn að segja orð við þig og svo ertu rífandi kjaft,“ sagði Heimir.

„Hagaðu þér eins og maður. Hættu að vera eins og leikmaður, vertu þjálfari,“ sagði Óskar Hrafn meðal annars og það mátti líka heyra Hallgríms svara honum.

Hér fyrir neðan má sjá þessi tvö mynd- og hljóðdæmi frá lífi Hallgríms Jónassonar á hliðarlínunni.