Ís­land í erfiðum riðli á EM

Ísland tryggði sér sæti á sínu fyrsta Evrópumóti í tólf ár með sigri á Færeyjum, 24-20, fyrr í þessum mánuði.

Í dag fengu íslensku stelpurnar svo að vita með hverjum þær verða í riðli á EM sem fer fram 28. nóvember til 15. desember næstkomandi.

Ísland var í þriðja styrkleikflokki þegar dregið var í riðla í Vín í dag. Íslenska liðið lenti í F-riðli ásamt Hollandi úr 1. styrkleikaflokki, Þýskalandi úr 2. styrkleikaflokki og Úkraínu úr 4. styrkleikaflokki. 

Riðill Íslands verður leikinn í Innsbruck í Austurríki. Tvö efstu lið hvers riðils komast í milliriðil en tvö neðstu falla úr leik.

Samkvæmt óstaðfestu leikjaplani mótsins mætir Ísland Hollandi 29. nóvember, Úkraínu 1. desember og Þýskalandi 3. desember.

Evrópumeistarar Noregs, sem Þórir Hergeirsson stýrir, eru í E-riðli með Austurríki, Slóveníu og Slóvakíu.

Riðlarnir á EM 2024