Starfaði fyrir pólska herinn og sýnir nú skart­gripi á Garðatorgi

Er um að ræða tvo viðburði. Sýningin Eldblóm þar sem dansarinn Sigga Soffía umbreytir dansi í vöruhönnun og uppskeruhátíð hjá gullsmiðnum Mörtu Staworowsku.

Ræktanleg flugeldasýning blóma

„Hugmyndir kvikna og taka flugið, springa út í allar áttir og falla í mismunandi jarðveg. Hér gefst tækifæri til að líta yfir farinn veg, skoða hugmyndir sem hafa orðið að veruleika, þær sem enn bíða og tækifærin fram undan,“ segir í fréttatilkynningu um Eldblóm.

Sigga Soffía Níelsdóttir hefur starfað víðs vegar sem dansari og danshöfundur en er einnig þekkt fyrir flugeldasýningahönnun og blómalistaverk.

„Japanska orðið yfir flugelda er hanabi en hana þýðir eldur og bi þýðir blóm. Japanir tala því um eldblóm. Síðastliðin ár hefur Sigga Soffía unnið með þessi hugrenningatengsl í lofti og á láði og hannað flugeldasýningar út frá kóreógrafíu. 

Þá hefur hún hannað ræktanlega flugeldasýningu blóma, nánar tiltekið blómainnsetningu sem springur út eftir sáningarforskrift. Nýjasta viðbótin við Eldblómaverkefnið er ilmur, drykkjarföng og matvörur auk fjölbreyttrar vöru- og upplifunarhönnunar. Þannig svífur Sigga Soffía á milli listforma og hönnunar- greina ásamt samstarfsfólki úr ýmsum geirum,“ segir í tilkynningunni.

Starfaði fyrir pólska herinn og var staðsett í Afganistan

Samdægurs verður svo haldin uppskeruhátíð hjá gullsmiðnum Mörtu Staworowsku sem hefur verið í vinnustofudvöl í safninu undanfarnar vikur.

„Marta er lærður landslagsarkitekt og gullsmiður. Hún flutti til Íslands fyrir sex árum og starfaði áður fyrir pólska herinn og var staðsett í Afganistan. Hún útskrifaðist fyrr á þessu árið sem gullsmiður frá Tækniskólanum og starfar hjá Aurum við smíði skartgripa. 

Það var Dóra Jónsdóttir gullsmíðameistari sem kynnti Mörtu fyrir víravirki á sínum tíma og hvatti hana til að fara í nám í gullsmíði.

Víravirkið er rauði þráðurinn í verkum Mörtu. Aðferðin er æva gömul og má rekja meðal annars til forn Egypta, Grikkja og Rómverja löngu fyrir Krist. Víravirki er einnig hluti af íslenska þjóðbúningnum. Mótífin sem gjarnan er unnið með í víravirki eru blóm og plöntu og tengjast þannig bakgrunni Mörtu í landslagsarkitektúr. Hönnuðir í dag halda áfram að finna þessu fínlega handverki farveg í nútíma skartgripum,“ segir í tilkynningunni.

Blóm og plöntur eru því í lykilhlutverki hjá báðum listamönnunum. Sýningarrýmin sem um ræðir „Safnið á röngunni“ og „Vinnustofudvölin“ eru óhefðbundin sýningarrými þar sem áhersla er lögð á sköpunarferlið og samtalið milli gesta, hönnuða og starfsmanna safnsins.