Líf­leg og skraut­leg kosninga­bar­átta að mati for­sætis­ráð­herra

Bjarni tók við sem forsætisráðherra þegar Katrín Jakobsdóttir sagði af sér til þess að fara í forsetaframboð í síðasta mánuði. Hann segir kosningabaráttuna nú eina þá eftirminnilegustu sem leiði kannski af því að sitjandi forseti gefi ekki kost á sér til endurkjörs.

„Þetta hefur verið líflegt og á köflum dálítið skrautlegt. Það er auðvitað einkennandi hversu margir eru þátttakendur í kapphlaupinu um að komast á Bessastaði. Það er kannski það sem stendur ekki síst upp úr,“ sagði Bjarni við fréttamann Stöðvar 2 eftir blaðamannafund ríkisstjórnarinnar vegna aðgerða fyrir Grindvíkinga í dag.

Sjálfur sagðist Bjarni vera kominn með tilfinningu fyrir því hvað hann ætlaði að gera í kjörklefanum en vildi ekki segja hvern hann ætlaði að kjósa. Hann vilji forðast að gera kosningarnar pólitískar þó að erfitt væri að forðast það með öllu í ljósi þess að fyrrverandi forsætisráðherra væri í framboði.

„Þá finnst mér kannski óþarfi að bæta á með því að taka skýra afstöðu sem formaður stjórnmálaflokks,“ sagði Bjarni.