Sagður hafa slegið eigin­konu sína í­trekað með steikar­pönnu

Annars vegar er manninum gefið að sök að slá konuna ítrekað með steikarpönnu, meðal annars í höfuð, öxl og olnboga í byrjun janúar umrætt ár. Fram kemur að umrædd panna hafi vegið rétt rúmt kíló.

Vegna árásarinnar hlaut konan ýmsa áverka víðs vegar um líkamann, meðal annars fimm sentímetra langar og þriggja til fjögurra millimetra djúpan skurð á hvirfli höfuðkúpunnar.

Hins vegar er manninum gefið að sök að slá konuna tvisvar sinnum með flötum lófa í háls og eyra á aðfangadag 2022.

Þess er krafist að maðurinn greiði konunni eina og hálfa milljón króna í miskabætur.

Það er embætti héraðssaksóknara sem höfðar málið og krefst þess að maðurinn verði dæmdur til refsingar og greiðslu alls sakarkostnaðar. Málið verður tekið fyrir í Héraðsdómi Reykjvíkur.