Ljóð­ræn endur­koma Eriksen en Slóvenar unnu sig til baka og sóttu stig

Þetta var fyrsi leikur Eriksen á Evrópumóti síðan hann fékk hjartastopp og hneig niður á Parken í leik gegn Finnlandi á 2020 mótinu.

Það tók hann ekki langan tíma að stimpla sig inn.

Danmörk byrjaði leikinn virkilega vel og komst verðskuldað yfir á 17. mínútu þegar langt innkast rataði til Jonasar Wind sem lagði boltann laglega með hælnum fyrir Eriksen sem setti hann í netið. Virkilega lagleg stoðsending og afgreiðslan engu síðri hjá Eriksen.

Eriksen var svo næstum því búinn að leggja upp slóvenskt sjálfsmark á 28. mínútu. Föst fyrirgjöf sem sveif rétt yfir grasinu og hafði viðkomu í tveimur varnarmönnum en boltinn fór rétt framhjá markinu.

Danir voru með öll völd á vellinum og máttu telja sig óheppna að hafa ekki sett annað mark áður en fyrri hálfleikur var flautaður af.

Sérstaklega í ljósi þess hversu vel Slóvenar unnu sig inn í leikinn þegar komið var út í seinni hálfleik.

Eftir mikla yfirburði Dana varð mun meira jafnvægi milli liðanna.

Slóvenar skoruðu svo á 77. mínútu Markið kom eftir hornspyrnu sem danska vörnin skallaði út á Erik Janza sem skaut viðstöðulaust í átt að marki. Boltinn fór af varnarmanni og breytti um stefnu á leið sinni í netið.

Slóvenar féllu aðeins til baka eftir markið og Danir voru hættulegri aðilinn undir lokin en tókst ekki að setja sigurmarkið og þurftu að sætta sig við jafntefli.

Með þeim í riðli eru England og Serbía. Leikur þeirra fer fram klukkan 19:00 í kvöld og verður í beinni textalýsingu hér á Vísi.