Vonarstjarna Bayern München fram­lengir við fé­lagið

Pavlović er djúpliggjandi miðjumaður og braut sér leið í aðalliðið í vetur.

Hann hefur verið hjá félaginu síðan hann var aðeins sjö ára gamall og þreytti frumraun sína með aðalliðinu í Der Klassiker gegn Borussia Dortmund í nóvember og lagði upp eitt mark í 4-0 sigri.

„Þetta er falleg saga að sjá hversu mikið Aleksander Pavlović hefur risið sem leikmaður undanfarna mánuði. Hann hefur fest sig í sessi sem lykilmaður í aðalliðinu á fyrsta tímabili sínu og er strax orðinn landsliðsmaður,“ sagði Cristoph Freund, yfirmaður íþrótta hjá Bayern München.

Pavlović spilaði alls 22 leiki á tímabilinu, þar af þrjá í Meistaradeildinni. Julian Nagelsmann valdi hann í landsliðshóp Þýskalands fyrir Evrópumótið í sumar en Pavlović þurfti að draga sig úr hópnum vegna hálskirtlabólgu.