Lesbíska dragdrottningin sem er að sigra tónlistarheiminn

Chappell er fædd árið 1998, alin upp í smábæ í Missouri fylki í Bandaríkjunum og kemur frá strangtrúaðri fjölskyldu. Hún sótti messur þrisvar í viku en dreymdi alltaf um að vera poppstjarna. Á uppvaxtarárunum leið henni alltaf eins og hún væri öðruvísi og þorði ekki að gangast við draumum sínum.

Popptónlistin heillaði hana alltaf og voru tónlistarkonurnar Kesha og Lady Gaga þá sérstaklega í uppáhaldi. Í æsku hélt Chappell að hinseginleikinn væri eitthvað sem væri rangt en eftir að hún fluttist til Los Angeles fékk hún frelsið til þess að finna sjálfa sig og koma út úr skápnum. 

Þrátt fyrir það segist hún enn glíma við hugmyndir um hómófóbíu úr æsku og til dæmis finnst henni enn erfitt að kyssa stelpu fyrir framan ókunnugt fólk en hún segist vera að vinna sig í gegnum það. Síðastliðin ár hefur hún átt í ástarsamböndum við stelpur og kom út sem lesbía en virðist þó ekki vera í opinberu sambandi um þessar mundir.

Hún hefur sömuleiðis rætt opinskátt um andleg veikindi en Chappell er greind með geðhvarfasýki eða bipolar 2. Fyrir tveimur árum skrifaði hún Instagram færslu þar sem hún sagði að veikindin hefðu áhrif á hennar daglega líf og tónlist hennar en hún leggi sig alla fram við að halda jafnvægi og fara vel með andlega heilsu og henni þyki mikilvægt að geta rætt það opinskátt.

Það tók nokkrar tilraunir fyrir Chappell að láta poppstjörnudrauminn ganga upp þrátt fyrir að hafa gefið út tónlist í mörg ár. Fyrsti plötusamningurinn hennar fór ekki sem skyldi og þurfti hún að flytja aftur heim til Missouri, með brotið hjarta. 

Hún gafst þó ekki upp, vann ýmsar vinnur til að safna sér pening og náði að koma sér aftur til Los Angeles. Í þetta skipti var hún algjörlega óhrædd við að vera hún sjálf, klæða sig upp sem dragdrottning og þróa sinn eigin persónulega tónlistarstíl sem hefur svona líka slegið í gegn.

Chappell er með tæplega 27 milljón mánaðarlega hlustendur á streymisveitunni Spotify og stærsta lagið hennar Good Luck Babe! er með um 252 milljón spilanir eins og er. 

Þá hefur hún hitað upp á tónleikaferðalagi fyrir Oliviu Rodrigo, komið fram á ýmsum stórum tónlistarhátíðum og er sjálf á leið í tónleikaferðalag. Hún er rísandi stjarna sem virðist vera rétt að byrja.

Sömuleiðis virðist hún eiga góða vini í tónlistarheiminum en sjálfur Elton John birti mynd af honum og Chappell á skemmtilegu pizzakvöldi. Elton John var klæddur í bláan flauels Gucci kósí galla og skrifaði að hann algjörlega elskaði Chappell.