Svona líta átta liða úr­slitin út í hand­bolta kvenna á ÓL

Lokaleikir riðlakeppninnar fóru fram í dag og þar fögnuðu Noregur, Danmörk og Svíþjóð öll sigri í sínum leikjum.

Nágrannaþjóðirnar enduðu þar með allar með sex stig í riðlinum en þær norsku urðu efstar á innbyrðis viðureignum þökk sé stórsigri sínum á Dönum. Svíar urðu í öðru sæti og Danir í því þriðja.

Noregur mætir því Brasilíu í átta liða úrslitunum en Brasilía endaði í fjórða sæti í hinum riðlinum.

Svíar spila við Ungverjaland og Danir mæta Hollendingum. Lokaleikur átta liða úrslitanna er síðan á milli Frakklands og Þýskalands.

Vinni Noregur leik sinn í átta liða úrslitunum þá bíður þeirra leikur á móti annað hvort Danmörku eða Hollandi í undanúrslitunum.

Leikirnir í átta liða úrslitum fara fram 6. ágúst næstkomandi.