Ólympíufarar selja gullsímana á Ebay

Samsung er einn helsti styrktaraðili ÓL og gaf öllum 17.000 keppendunum gullhúðaðan síma. Margir keppendur sem hafa unnið til verðlauna hafa sést nota símann til að taka sjálfur á verðlaunapallinum.

Þegar leitað er að gullsímanum á Ebay má finna fjölda boða þar sem síminn er sagður ónotaður eða í nýlegu ástandi.

Einn keppandi auglýsir símann til sölu á 10.000 dollara í staðgreiðslu, sem jafngildir um 1,4 milljónum króna. Uppboðið verður opið fram á föstudag og stendur nú við fjórðung af staðgreiðsluverðinu. 

Samsung hefur ekki tjáð sig sérstaklega um málið, annað en að segja það ánægjuefni að Ólympíufarar sjáist með símann og það hafi leitt til söluaukningar.