Vonarstjarna City og Noregs fót­brotnaði

Jack Gaughan, blaðamaður Daily Mail, greindi frá þessu í kvöld og sagði auðvelt að kenna í brjósti um Bobb sem fór mikinn á undirbúningstímabilinu með City og leit vel út í leiknum um Samfélagsskjöldinn um síðustu helgi. Þar átti hann stoðsendingu á Bernardo Silva og var valinn maður leiksins en City vann í vítaspyrnukeppni.

Gaughan segir ljóst að Bobb hefði getað tryggt sér hægri kantstöðuna hjá City í vetur en það verður þá varla fyrr en eftir áramót.

Blaðamaðurinn Fabrizio Romano segir að Bobb verði frá keppni í nokkra mánuði en þessi 21 árs gamli leikmaður kom við sögu í 14 deildarleikjum á síðustu leiktíð og skoraði eitt mark.

Fótbrotið er ekki bara áfall fyrir Bobb og City heldur einnig norska landsliðið en þjálfari þess Ståle Solbakken, sagði við VG í Noregi:

„Það kom upp atvik á æfingu í dag sem því miður endaði illa fyrir Oscar. Ég bíð eftir endanlegri skýrslu en það bendir allt til þess að hann verði lengi frá,“ sagði Solbakken.