KR-ingar með fæst stig úr inn­byrðis leikjum neðstu liðanna

Eftir 3-2 endurkomu HK á KR í Kórnum í gær munar aðeins tveimur stigum á KR (18 stig) í níunda sætinu og Fylki (16 stig) sem situr í botnsætinu. Vestri og HK eru bæði með sautján stig. Það stefnir því í æsispennandi fallbaráttu í haust.

KR fékk tvo leiki á móti liðum úr þessum hópi á síðustu viku til að losna við fallbaráttudrauginn úr Vesturbænum en uppskeran úr leikjunum við Vestra og HK var núll stig og þrjú mörk í mínus.

Það þýðir jafnframt að KR er með lélegasta árangurinn í innbyrðis leikjum þessara fjögurra neðstu liða deildarinnar.

KR-ingar hafa aðeins náð að vinna einn af sex leikjum sínum á móti Vestra (1 stig í húsi), HK (0 stig) og Fylki (4 stig). Liðið vann Fylki í fyrstu umferðinni en hafa síðan spilað fimm leiki við fyrrnefnd lið án þess að fagna sigri.

KR hefur fengið á sig fjórtán mörk í þessum sex leikjum sínum við neðstu liðin eða 2,3 mörk að meðaltali í leik.

Fylkir fékk kannski bara eitt stig á móti KR en hefur unnið hina þrjá leiki sína. Liðið á líka eftir að spila við Vestra á Ísafirði áður en deildinni verður skipt upp.

HK hefur aftur á móti náð í sex af sjö stigum sínum úr leikjunum við KR. Uppskeran úr leikjum við Vestra og Fylki er aðeins eitt stig af tólf mögulegum.