Tæpur helmingur í­búa hefur séð myndina

Ljósvíkingar var frumsýnd í Ísafjarðarbíó 5. september og hefur aðsóknin á myndina verið stöðug síðan þá. Í upphafi vikunnar varð ljóst að myndin slagaði upp í að vera mest sótta mynd þessarar aldar í bíóinu og í gær féll metið loksins.

Alls fóru níutíu manns að sjá myndina í gær og voru Guðrún og Bjarni gestir númer 1151 og 1152. Snævar Sölvi, leikstjóri Ljósvíkinga, færði þeim blóm í tilefni þess. Alls búa um 2.800 manns á Ísafirði og fer aðsóknin því að slaga upp í helming íbúafjöldans.

Fyrir tilkomu Ljósvíkinga var mest sótta mynd aldarinnar á Ísafirði var Mamma Mia 2 með 1150 áhorfendur en fyrir aldamót höfðu Með allt og hreinu og Nýtt líf fengið tæplega 1200 áhorfendur.

Bolvíkingur gerir mynd um Ísafjörð

Vafalaust er ein ástæðan fyrir vinsældunum sú að myndin gerist á Ísafirði, er tekin þar upp og komu margir Ísfirðingar að gerð myndarinnar. Snævar Sölvi Sölvason, leikstjóri myndarinnar, er frá Bolungarvík og staðsetti hann fyrstu mynd sína, Albatross, líka fyrir vestan

Ljósvíkingar fjallar um æskuvini sem reka saman vinsælan veitingastað á Ísafirði. Um sama leiti og þeim gefst kostur á að hafa staðinn opinn árið um kring, kemur annar vinurinn út úr skápnum sem kona.

Með aðalhlutverk í myndinni fara Björn Jörundur Friðbjörnsson, Arna Magnea Danks, Sara Dögg Ásgeirsdóttir, Helgi Björnsson, Vigdís Hafliðadóttir, Ólafía Hrönn Jónsdóttir, Pálmi Gestsson og Sólveig Arnarsdóttir.