Óttast ekki bikar­þynnku: „Al­vöru sigur­vegarar finna sér hvatningu“

„Þetta eru búnir að vera svo­lítið öðru­vísi dagar. Ég viður­kenni það alveg,“ segir Hall­grímur, þjálfari bikarmeistara KA sem tryggðu félaginu fyrsta bikarmeistaratitilinn í fótbolta með sigri á Víkingi Reykjavík í úrslitaleik Mjólkurbikarsins á Laugardalsvelli á laugardaginn síðastliðinn.  

„Þetta er búið að vera alveg æðis­legt. Við tókum flugið norður eftir leik og fórum svo beint út að borða saman. Svo hittum við stuðningsmenn í KA-heimilinu og höfðum gaman vel fram á nótt. Ég var síðan búinn að á­kveða að gefa leik­mönnum frí frá æfingu daginn eftir. Upp­haf­lega átti nú að vera æfing en ég var búinn að á­kveða það að ef við yrðum bikar­meistarar þá myndi ég gefa liðinu frí. Sunnu­dagurinn fór því bara í það, fyrir mig per­sónu­lega hið minnsta, að taka því ró­lega. 

Leikmenn KA fengu svo heilan dag með fjöl­skyldum sínum og vinum daginn eftir úrslitaleikinn.

„Við hittumst svo á mjög léttri æfingu á mánu­daginn var. Þar kom bæjar­stýra Akur­eyrar að hitta okkur,með hamingjuóskir og blóm. Í kjöl­far þeirrar heim­sóknar tók við ró­leg og skemmti­leg æfing. Svo fór fókusinn yfir á leikinn í dag. Það er stutt á milli leikja í fót­boltanum. Við eigum HK á heima­velli í dag og erum með fullan fókus á þeim leik. Erum klárir í hann.“

Fengu blessun þjálfarans til að sleppa af sér beislinu

Hallgrímur segir að fögnuður KA-manna hafi verið tekinn alla leið í kjölfar þessa sögurlega sigurs í Mjólkurbikarnum.

„Já og um fylli­lega verð­skulduð fagnaðar­læti að ræða. Með góðu leyfi þjálfarans að menn myndu fara og hafa gaman þetta kvöld. Það var gert. Við skemmtum okkur saman í KA-heimilinu. Með fullt af fólki þar sem að bikarnum var að sjálf­sögðu stillt upp. Virki­lega gaman að gera þetta í KA-heimilinu. Hand­bolta­höllin var opnuð og við skemmtum okkur þar inni. Það var virki­lega gaman að sjá hvað þetta þýddi mikið fyrir marga. Maður gerði sér ekki al­menni­lega grein fyrir því hvað þetta virki­lega þýddi mikið fyrir fólkið okkar hérna fyrr en að bikarinn var í höfn. Mér fannst mjög gaman að sjá það.“

Það að koma með bikarinn til Akur­eyrar. Það hlýtur að hafa verið ansi sér­stök stund fyrir þig sem þjálfara KA-liðsins að upp­lifa?

„Já alveg æðis­leg stund. Fólk beið eftir okkur á Akur­eyrar­flug­vellinum þegar að við lentum. Það fylgir því ó­trú­lega góð til­finning að þetta hafi tekist. Við höfðum verið í bikar­úr­litunum árið áður og fé­lagið fjórum sinnum áður í sögunni. Um­ræðan snerist að mörgu leiti um það hvort liðið væri komið nógu langt til að geta unnið þetta. Hvort við værum nógu þroskaðir og nógu miklir sigur­vegarar. Nú tókst þetta. Það var yndis­leg til­finning.“

Ekki hræddur við bikarþynnku

Staðan er sú að KA hefur að litlu að keppa í Bestu deildinni það sem eftir er tímabils. Evrópusæti er í höfn eftir bikarsigurinn og þá er liðið er í þægilegri fjarlægð frá fallsæti í áttunda sæti deildarinnar. Undanfarnir dagar hafa farið í endurheimt eftir úrslitaleik laugardagsins. En á sama tíma er andstæðingur dagsins, HK, í fallbaráttu og getur með sigri í dag komið sér fjórum stigum frá fallsæti.

Lífið heldur á­fram og næsti leikur tekur við í dag. Ertu hræddur við bikar­þynnku?

„Nei ég er ekki hræddur við bikar­þynnku,“ svarar Hallgrímur. „Ég er spenntur að sjá. Það verður gert að­eins meira úr þessum leik. Bikarinn verður á svæðinu. Krakkarnir geta mætt og fengið mynd af sér með honum og það verður að­eins öðru­vísi dag­skrá fyrir leik dagsins heldur en fyrir hefð­bundinn deildar­leik. Menn eiga að bara halda inn á völlinn og njóta þess að taka á því. Spila fót­bolta undir minni pressu en hefur verið ríkjandi síðustu daga.“

Hallgrímur hefur trú á því að KA-menn mæti mjög vel gíraðir leikinn gegn HK. 

„Með allt öðru­vísi hluti undir. Það er ekki eins mikil pressa. Það skemmti­legasta í heimi er að spila fót­bolta. Ég ætla að vona að menn fari bara út og sýni að menn séu hundrað prósent til­búnir í að leggja sig fram fyrir KA þó þeir hafi verið að vinna titil fyrir nokkrum dögum síðan. “

Leikirnir eftir mót eru ekki skemmtilegir

En verður ekki vandamál að mótivera menn fyrir þennan lokahluta tímabilsins?

„Nei það held ég að verði ekki vanda­mál. Ég hef rætt þetta við mína leik­menn. Al­vöru sigur­vegarar finna sér hvatningu til þess að spila. Næstu leikir eftir að mótið klárast eru ekkert sér­stak­lega skemmti­legir leikir. Það eru vetrar­leikir og með fullri virðingu fyrir Kjarna­fæðimótinu þá eru það ekki skemmti­legustu leikirnir fyrir KA að spila. 

Leikirnir fram­undan í Bestu deildinni eru leikirnir sem menn eiga njóta þess að taka al­menni­lega á því. Ekki gleyma því heldur að við fórum í þennan neðri hluta Bestu deildarinnar í fyrra eftir mjög spennandi tíma­bil þar sem að við komumst í bikar­úr­slit og fórum langt í Evrópu­keppni. Þrátt fyrir það allt töpuðum við bara einum leik í neðri hlutanum. Unnum fjóra af okkar fimm leikjum þar.“ 

„Við erum að spila á heima­velli í dag. Fólkið okkar er að koma og þetta verður sér­stök stund sem við munum eiga á vellinum. Ég býst við því að ég fái KA lið inn á völlinn sem er að fara leggja sig hundrað prósent fram.

Við erum alltaf að vinna að ein­hverju. Erum með unga leik­menn innan okkar raða sem munu fá fleiri tæki­færi þar sem að við fáum fleiri tæki­færi núna til þess að hreyfa liðið. Það munu fleiri fá sénsinn. Maður vill sjá þá stráka koma inn og grípa þann séns. Ég vil að þeir sýni mér að þeir séu til­búnir í þetta. Ég bil bara sjá að menn taki á því. Að menn sýni al­vöru KA hjarta og njóti þess að taka á því án þess að það sé mikil pressa á okkur.“

Leikur KA og HK hefst klukkan korter yfir fjögur í dag og verður sýndur í beinni útsendingu á Stöð 2 Sport.