KSÍ hefur nú staðfest leikjadagskrána í þeim fjórum umferðum sem eftir eru, í efri og neðri hluta Bestu deildar karla. Mótinu lýkur ekki fyrr en undir lok október, vegna landsleikjahlés um miðjan mánuðinn.
Í lokaumferðinni spila öll lið nema Víkingur og Breiðablik á laugardegi, 26. október. Mögulegur úrslitaleikur Víkings og Breiðabliks um titilinn verður svo sunnudaginn 27. október klukkan 14. Spilað verður í Víkinni vegna þess að Víkingar enduðu hefðbundnu deildakeppnina ofar en Blikar.
Þessi mögulegi úrslitaleikur verður því þremur dögum eftir að Víkingar mæta Cercle Brugge í Sambandsdeild Evrópu, á heimavelli Blika í Kópavoginum.
Spennan er ekki bara mikil í titilbaráttunni heldur einnig í baráttunni um 3. sætið mikilvæga, sem gefur þátttökurétt í Evrópukeppni á næsta ári. Eftir að KA varð bikarmeistari um helgina, og tók þar með Evrópusæti, er ljóst að 4. sæti deildarinnar dugar ekki til að komast í Evrópukeppni.
Hér að neðan má sjá yfirlit yfir síðustu umferðirnar, í efri og neðri hlutanum, og stöðutöflurnar.
Hörð fallbarátta
Fjögur lið eiga enn á hættu að falla úr deildinni. Fylkir og KR eru í fallsætum en HK og KR eru skammt undan og ljóst að allt getur gerst í lokaumferðunum.
