Mílu­deildin er stærsta Val­orant-mótið frá upp­hafi

„Míludeildin í ár er stærsta Val­orant-mót sem hefur verið haldið á Íslandi hingað til og þetta gengur rosalega vel,“ segir Daníel Máni Óskars­son, móta­stjóri, um deildina sem kennd er við aðalbakhjarlinn, Mílu.

Valorant hefur fest sig í sessi sem einn vinsælasti tölvuleikur heims og Ísland er þar engin undantekning en mánaðarlega eru spilarar út um allan heim á bilinu 16 til 20 milljónir.

Mótastjórinn Mist Reyk­dal Magnús­dóttir segir að þegar fjórar umferðir eru að baki sé ljóst að keppnin framundan verði æsispennandi enda til mikils að vinna því verðlaunaféð nemur samanlagt 1,5 milljónum króna. Hún bendir á að slíkar verðlauna upphæðir eru sjaldséðar og ekki þurfi að hafa mörg orð um hversu jákvætt þetta er fyrir rafíþróttir kvenna.

Ingvar Bjarnason, hjá Mílu, segir sérstaklega ánægjulegt að fá þetta tækifæri til að styðja við einu kvennadeildina í rafíþróttum á Íslandi, enda hafi Míla sett sér metnaðarfull markmið um að gegna samfélagslegri ábyrgð í samræmi við Heimsmarkmið Sameinuðu þjóðanna þar sem meðal annars er lögð áhersla á jafnrétti kynjanna.

SÞ leggja einnig í markmiðum sínum áherslu á heilsu og vellíðan og þar sé stuðningur við keppni í Valorant einnig skemmtilegur kostur því leikurinn njóti ekki síst mikilla vinsælda hjá yngri spilurum og áhersla Rafíþróttasambands Íslands á félagslega þáttinn og hreyfingu í rafíþróttaiðkun barna og unglinga stuðli einmitt einnig að aukinni vellíðan og bættri líkamlegri- og andlegri heilsu.