Milton safnar aftur krafti

Áfram er búist við því að styrkur Miltons muni sveiflast til og frá áður en hann nær landi í Flórída á miðvikudagskvöld eða fimmtudagsmorgun. Þrátt fyrir að hann muni missa kraft er reiknað með því að sjávarstaða muni hækka gífurlega mikið og sjór muni ná langt inn á land. Þá mun Milton valda mikilli rigningu með meðfylgjandi hættu á skyndiflóðum og flóðum í byggðum.

Skilgreiningin á hvaða stigs fellibyljir eru veltur á vindhraða. Til að verða fimmta stigs þarf vindhraði fellibyls að vera að minnsta kosti sjötíu metrar á sekúndu.

Sjá einnig: Koma sér í skjól undan fellibylnum Milton

Embættismenn hafa varað fólk við því að treysta á að Milton muni missa mikinn kraft og hvatt fólk til að hlýða skipunum um brottflutning.

Ron DeSantis, ríkisstjóri Flórída, hvatti fólk í dag til að flýja.

„Þetta óveður mun fara yfir Flórída-skagann og fara út á Atlantshafið, líklega enn sem fellibylur,“ sagði DeStantis. „Svo hann mun hafa mikil áhrif um allt ríkið.“

Hann sagði að fólk þyrfti að hafa hraðar hendur ef það ætlaði sér að flýja undan Milton.

Hér að neðan má sjá myndband sem tekið var upp í dag þegar flugvél var flogið inn í Milton svo hægt væri að afla gagna um fellibylinn.

Fellibylurinn Helena er nýbúinn að leika Flórída og önnur ríki á svæðinu grátt. Fregnir hafa borist af því að eldsneyti sé búið í Flórída og að langar raðir hafi myndast við þær bensínstöðvar sem enn eru opnar.

Þá segir Washington Post frá því að einhverjir íbúar hafi ákveðið að taka slaginn og ætli að halda kyrru fyrir í Tampa Bay, þar sem talið er að Milton geti valdið miklum skaða.

Ein kona sem rætt var við sagði að hún og eiginmaður hennar hefðu ekki flúið þegar Helena fór yfir svæðið og ætli að gera að sama aftur. Þau búi á fjórðu hæð og séu nokkuð örugg þar. Einnig var rætt við tvo háskólanemendur sem ætluðu að koma sér fyrir á hóteli sem hannað er til að þola fellibylji.

Þeir segja bæinn undarlega tóman og óvissuna erfiða.