„Falsfréttin“ og „þvælan“ sem raungerðist hratt

Halla Tómasdóttir forseti Íslands féllst í dag á beiðni Bjarna Benediktssonar forsætisráðherra um að rjúfa þing. Þá féllst hún á lausnarbeiðni fyrir Bjarna og ríkisstjórn sína. Bað Halla í framhaldinu ríkisstjórn um að starfa áfram sem starfsstjórn. Á það hafa Sjálfstæðisflokkur og Framsóknarflokkur fallist en Vinstri græn hafnað.

Svandís svaraði ekki símtölum fréttastofu í dag. Hún hafði áður viðrað það að taka þátt í starfsstjórn undir forystu Sigurðar Inga Jóhannssonar fram að kosningum. Ljóst var að Svandís og VG hugnaðist ekki frekara samstarf við Sjálfstæðisflokk Bjarna Benediktssonar eftir sjö ára samstarf, lengst af undir forystu Katrínar Jakobsdóttur.

Fréttastofu bárust ábendingar upp úr hádegi í dag þess efnis að Svandís væri byrjuð að taka saman á skrifstofu sinni í innviðaráðuneytinu. Fréttastofa hringdi þrjú símtöl í Iðunni Garðarsdóttur og Kára Gautason, aðstoðarmenn Svandísar sem innviðaráðherra. Þau sögðu bæði ekkert hæft í því. Um væri að ræða falsfrétt og þvælu, eins og Kári komst að orði, og Iðunn sagði ekkert slíkt ákveðið. Málin myndu skýrast á næstu dögum.

Halla forseti sagðist aðspurð á fimmta tímanum í dag ekki geta svarað því hvort Vinstri græn yrðu í starfsstjórninni sem hún hefði beðið ríkisstjórnina að mynda. Um það leyti sem Bjarni sleppti orðinu í viðtali á Bessastöðum þar sem hann sagðist ekki trúa því að Vinstri græn yrðu ekki hluti af starfsstjórninni birti Svandís Facebook-færslu. Klukkan sló fimm og sagði Svandís í tvö hundruð orða færslu að VG yrði ekki hluti af starfsstjórn.

Hálfri klukkustund síðar mætti fréttamaður RÚV í innviðaráðuneytið og tók viðtal við Svandísi. Eins og sjá mátti í kvöldfréttum RÚV var skrifstofa Svandísar svo gott sem tóm. Mikið verk hafði verið unnið á skömmum tíma, búið að fylla marga kassa og hreinsa úr hillum.

Guðmundur Ingi Guðbrandsson, varaformaður VG, mætti í myndver í kvöldfréttir Stöðvar 2. Þar sagði hann þingflokk VG hafa ákveðið að taka ekki þátt í frekara samstarfi við Sjálfstæðisflokkinn. Hann hafnaði því að flokkurinn væri að bregðast skyldum sínum með því að stíga frá borði.

Hann var einnig spurður að því hvort hann væri búinn að tæma skrifstofu sína í félags- og vinnumarkaðsráðuneytinu eða hvort það yrði fyrsta verk á morgun. Guðmundur Ingi hló og sagði skrifstofuna fulla af kössum. Hann væri á leiðinni þangað aftur til að klára að tæma og því ljóst að Vinstri græn hafa hraðar hendur þegar kemur að því að skapa rými fyrir ráðherra Sjálfstæðisflokks og Framsóknar sem Sigurður Ingi Jóhannsson hefur sagt eðlilegt að fylli í skarð fráfarandi ráðherra Vinstri grænna.