Snúrunni lokað fyrir fullt og allt

Rakel Hlín Bergsdóttir eigandi Snúrunnar segir í samtali við fréttastofu að nú hefjist rýmingarsala og að opið verði í versluninni, sem stendur við Ármúla 38, meðan birgðir endast. 

„Ég ætla að snúa mér að öðrum málum. Ég er búin að vera með þetta í tíu ár og þetta er komið gott,“ segir Rakel í samtali við Vísi.

„Þetta var ekkert frábært síðustu tvö árin en við erum aðeins búin að rétta okkur af í ár. Svo var þetta bara orðin of mikil vinna fyrir of lítið. Og áhuginn var kominn annað,“ segir Rakel Hlín spurð út í reksturinn.

Snúran hófst sem vefverslun árið 2014 en eftir árs rekstur opnaði Rakel verslun Snúrunnar í Síðumúla. Árið 2017 fluttist verslunin að Ármúla 38 og hefur staðið þar síðan. Þrjú ár eru síðan önnur verslun Snúrunnar opnaði í Smáralind en henni var lokað í fyrra.