Allt á suðu­punkti í Þor­láks­höfn vegna kosninganna

Kosningarnar hófust 25. nóvember og standa þær til 9. desember.

„Sveitarfélagið hefur enga afstöðu í þessum málum og hefur ekki lagt vinnu í að kanna sannleiksgildi í nafnlausum bæklingum,“ segir Elliði Vignisson bæjarstjóri Ölfus.

Meðal þess sem bent hefur verið á er að Heidelberg sé á bannlistum stórra fyrirtækja og þá vegna brota á mannréttindum og alþjóðalögum sem gætu verið óásættanlegar viðskiptavenjur, náttúruspjöll og svo framvegis. Þar á meðal er Storebrand sem er stærsta eignarstýringafyrirtæki Norðurlanda og á rætur sínar að rekja til norska ríkisolíusjóðsins. Í heimi fagfjárfesta er það þekkt og virt fyrirtæki.

Góður granni?

Einnig er nefnt að PFA, sem er stærsti lífeyrissjóður Danmerkur sé með Heidelberg á slíkum lista, Danske Bank sem er stærsti banki Danmerkur einnig, sem og KLP sem er stærsti lífeyrissjóður Noregs. Og mörg fyrirtæki önnur mætti nefna. Þetta þykir mörgum skjóta skökku við þegar litið er til þess að fyrirtækið hafi kynnt sig sem heiðvirt, umhverfisvænt og samfélagsvænt fyrirtæki sem ætlar sér að vera „góður granni“.

Spurt er að ef fyrirtæki í nágrannalöndum okkar eru með Heidelberg á bannlista og ráðleggja þar með öðrum að stunda ekki viðskipti við Heidelberg, hvaða ástæður hefur sveitarstjórnin í Ölfusi fyrir því að telja slíkar ráðleggingar ómerkar? Ef fyrirtækið hefur brotið mannréttindi og alþjóðalög í öðrum löndum og íbúar þar hafa kvartað og mótmælt vegna mengunar og umhverfisáhrifa. Hvers vegna ættu íbúar Ölfuss að treysta því að Heidelberg reynist þeim góður granni? Af hverju er verið að bjóða svona fyrirtæki í Ölfus?

Elliði segir sinn vilja birtast í niðurstöðu kosninga

Snögg leit á vefnum leiðir reyndar í ljós að Heidelberg er á listum með Carlsberg, Coca Cola, Seven Eleven, Costco og fleiri fyrirtækjum.

Elliði vill halda hlutleysi sínu gagnvart kosningunum rækilega til haga.

„Sjálfur hef ég ekki séð þessa bæklinga en heyrt af þeim og hef svo sem enga skoðun á þeim. Okkar hlutverk hjá sveitarfélaginu er það eitt að gæta að því að kosningar fari fram í samræmi við lög þar að lútandi og vilja bæjarstjórnar.“

Elliði tekur fram að sveitarfélagið hafi enga samninga gert við Heidelberg og til þess komi ekki nema það sá sé vilji íbúa.

„Og sá vilji kemur fram í íbúakosningu og verður í kjölfar þess vilji sveitarfélagsins og þar með vilji minn.“

Kæra First Water setur strik í reikninginn

Í áðurnefndum bæklingum hefur einnig komið fram kæra First Water en hugmyndin, sú sem kosið er um, er sú að mölunarverksmiðja Heidelberg verði staðsett við hlið landeldis þess fyrirtækis. 

Ása Berglind Hjálmarsdóttir, sem situr í minnihluta bæjarstjórnar, hefur meðal annars gert þær áhyggjur að umfjöllunarefni. Og segir rannsóknir ekki svara neinu um hvort starfsemi Heidelbergs hafi truflandi áhrif á það.

Elliði segir hins vegar, þá hvað varðar afstöðu bæjarstjórnar, að hún hafi eingöngu komið fram í þeirri ákvörðun að vísa málinu til íbúakosninga.

„Af sjö bæjarfulltrúum hefur eingöngu einn gefið upp sína afstöðu og sennilegt er að það verði þannig. Hinir sex hafa haldið sig til hlés og einmitt sér að stjórnsýslulegum ferli málsins.“

Segir RÚV búa til strámann og ráðast svo gegn honum

Elliði segir þetta sennilega til komið vegna þess að í bæði meiri og minnihluta séu uppi fleiri en ein skoðun og því ekki tækt að ætla að keyra málið áfram á flokkslegum línum.

„Illu heilli hefur fólki hinsvegar verið legið á hálsi allslags skoðanir og meira að segja ríkisútvarpið okkar allra lagðist svo lágt að fullyrða að íbúafundur sveitarfélagsins hafi verið haldinn af stjórnmálaafli, sennilega í þeim tilgangi að draga upp pólitískar línur í þessari umræðu. Það er leiður plagsiður að gera fólki upp skoðun og ráðast síðan gegn skoðun þeirra en því miður hefur það verið áberandi í umræðu um þetta mál.“

Elliði neitar hins vegar alfarið að gefa upp neina afstöðu.

„Ég segi ekki sannari orð en þau að ég verð fyrst og fremst feginn þegar ákvörðun liggur fyrir og hægt að fara að vinna samkvæmt því.“