Fyrr­verandi líf­vörður Schumachers reyndi að fjárkúga hann

Fritsche vann fyrir Schumacher-fjölskylduna í átta ár og hafði aðgang að mjög viðkvæmum upplýsingum um ástand ökuþórsins fyrrverandi. Schumacher hefur ekki sést opinberlega síðan hann varð fyrir heilaskaða í skíðaslysi í ölpunum fyrir ellefu árum.

Fritsche var leystur undan störfum hjá Schumacher-fjölskyldunni fyrr á þessu ári eftir að brestir komu í samband hans við hana. Fritsche var ekki sáttur við þær málalyktir og lagði því á ráðin með að kúga fé út úr Schumacher-fjölskyldunni til að hefna sín.

Talið er að Fritsche hafi stolið 1.500 skrám af heimili Schumachers. Hann á að hafa komið þeim fyrir á tveimur usb-kubbum og tveimur hörðum diskum dagana áður en hann var rekinn. Um var að ræða myndir, myndbönd, lyfja- og sjúkraskrár Schumachers.

Til að aðstoða sig við fjárkúgunina fékk Fritsche til liðs við sig vin sinn, Yilmaz Tozturkan og son hans, Daniel Lins. Sonurinn setti sig í samband við Schumacher-fjölskylduna og talið er að hann hafi sent þeim nokkrar skrár til sönunnar um að þeir hefðu gögnin undir höndum.

Þremenningarnir eru sakaðir um að hafa krafist tólf milljóna punda frá Corinnu, eiginkonu Schumachers, gegn því að skila skránum. Þeir hótuðu annars að birta skrárnar á djúpvefnum.

Fritsche, sem hóf að vinna fyrir Schumacher-fjölskylduna fjórum mánuðum fyrir skíðaslysið örlagaríka, var handtekinn á heimili sínu í byrjun júlí. Í kjölfarið voru feðgarnir handteknir.

Tozturkan er enn í haldi lögreglu en Fritsche og Lins var sleppt gegn tryggingu.