Gleðilegir gestir í hátíðarskapi á safninu

Dóra Júlía Agnarsdóttir skrifar 4. desember 2024 20:03

Mæðgurnar Anna Margrét Jónsdóttir og Elma Dís Árnadóttir létu sig ekki vanta á jólalegan viðburð Listasafns Íslands og Litrófs síðastliðinn sunnudag. Elísa B. Guðmundsdóttir

Það var jólalegt líf og fjör á fyrsta í aðventu á Listasafni Íslands þegar safnið og Litróf sameinuðu krafta sína í hátíðlegri gjafapappírsútgáfu. Margt var um manninn og jólaskapið leyndi sér ekki.

Listaverk Sölva Helgasonar (1820–1895) voru færð yfir á gjafapappír en Sölvi Helgason, einnig þekktur sem Sólon Íslandus, var einstakur listamaður og sérvitringur.

„Verk hans einkennast af litríkum og fjölbreyttum blómamynstrum og safneign Listasafns Íslands geymir ódauðleg verk eftir hann. Í þessu verkefni fengu þessi óvenjulegu listaverk nýtt líf sem gjafapappír, þar sem þau sameina fagurfræði og notagildi.

Á viðburðinum var sýnt úrval af nýju gjafapappírsútgáfunni, gestir nutu hátíðlegrar stemningar með léttum veitingum og þeir sem mættu gátu tryggt sér pappírinn á staðnum. Safnbúðin bauð einnig upp á fjölbreytt úrval af vörum tengdum jólunum, auk þjónustu við innpökkun.

Gjafapappírinn hefur einnig verið kynntur sem listaverk í sjálfu sér, þar sem hver örk er hönnuð með það að markmiði að gleðja og vekja athygli á mikilvægi listar í daglegu lífi jafnvel sem innrammaður hluti af heimilinu.“

Hér má sjá myndir frá viðburðinum: