For­eldrar hæst­á­nægðir með Lund þó breytingar verði gerðar

Þetta segir Helgi Grímsson, sviðsstjóri skóla- og frístundasviðs Reykjavíkur, um viðbrögð foreldra á fundi með starfsfólki og fulltrúum skóla- og frístundasviðs á miðvikudag. Hann segir mikilvægt í allri umræðu að hafa í huga að um ungbarnaleikskóla sé að ræða og þarfir svo ungra barna ólíkar þeim sem þekkist á leikskólum fyrir tveggja ára börn og eldri.

Greint var frá því þann 8. nóvember að starfsfólk Reykjavíkurborgar hefði farið í óboðað eftirlit vegna ábendinga um slæman aðbúnað barnanna á leikskólanum. Þá hafði leikskólinn verði til umræðu í Facebook-hópnum Mæðratips þar sem fyrrverandi starfsmaður sagði börnin aldrei fara út að leika, ekkert skipulagt starf væri í leikskólanum og flest börnin væru grátandi lungann úr deginum og að væflast um í herbergjum skólans.

„Við höfum unnið að því með leikskólanum að fara í gegnum bæði áskoranir og tækifæri,“ segir Helgi. Farið hafi verið í nokkrar heimsóknir í skólann, rætt við starfsfólk og leikskólastjórann Valgerði H. Valgeirsdóttur.

„Á fundinum fórum við yfir það sem við viljum leggja á borð fyrir skólann og fara fram á úrbætur,“ segir Helgi.

Hann segist finna fyrir mikilli hlýju hjá starfsfólki sem sé mjög mikilsvert og mikið sé lagt upp úr öryggi barnanna í skólanum.

„En við sjáum tækifæri, sérstaklega hjá eldri börnum,“ segir Helgi og bendir á að mikill munur sé á rúmlega eins árs barni og svo tveggja ára barni, hvað varðar tækifæri til að veita meira sjálfræði og sjálfseflingu þegar komi að matartímanum, leiktíma og víðar.

„Þetta er eitthvað sem við erum að vinna með leikskólastjóra í að þróa og útfæra. Við notum næstu vikur til að fara í þessar útfærslur á starfinu.“

Fram kom í frétt Mbl.is að meðal krafna um breytinga á aðbúnaði væru ný húsgögn sem hentuðu betur svo ungum börnum. Þau hefðu hingað til setið í háum stólum og verið bundin í þá.

„Foreldrar þekkja þetta úr eldhúsum og bílstólum að börn eru bundin því annars gætu þau farið sér að voða,“ segir Helgi. Þau þurfi eðlilega að vera bundin á meðan þau séu að matast, svo þau fari ekki sjálfum sér að voða.

„Við teljum að skoða þurfi hve lengi börn sitji í stólunum, hvort þau séu að leika sér, að bíða eða annað. Við viljum auka sjálfstæði barnanna með því að hafa meiri skilgreiningu á því hvenær börn eru í þessum stólum og hvenær ekki.“

Vinnan sem unnin sé með Lundi sé gott veganesti í umræðu um uppbygginu leikskóla, ungbarnadeilda og ungbarnaleikskóla.

Upplýsingagjöf mætti vera betri

Hann segir foreldra á fundinum hafa talið að skóla- og frístundasvið hefði mátt standa betur að upplýsingagjöf til foreldra undanfarnar vikur.

„Þetta eru foreldrar sem eru ánægðir með leikskólann og merkja vellíðan hjá börnum sínum.“

Þeim hafi fundist umræðan á samfélagsmiðlum bæði mjög óvægin og ósanngjörn.

„Þess vegna erum við í þessari vegferð. Svo allir séu sáttir.“

Hann segir aldrei áður hafa komið fram ábendingar um að hlutir gætu verið í betri farvegi á leikskólanum Lundi. Þetta séu aðstæður sem lært verði að og tekið inn í breiðara samtal.