Af og frá að Iceguys taki þátt í Söngva­keppninni

Líkt og fram hefur komið fer Söngvakeppnin fram þrjár helgar í febrúar. Tíu lög munu taka þátt og hyggst Ríkisútvarpið svipta hulunni af keppendum þann 17. janúar. Keppnin í ár verður með breyttu sniði eftir gríðarlega umdeilda keppni í fyrra og er úrslitaeinvígið svokallaða á bak og burt í þetta skiptið.

Eins og alþjóð man eftir reyndist þátttaka Íslands í Eurovision í fyrra þar að auki gríðarlega umdeild hérlendis vegna þátttöku Ísrael í keppninni vegna stríðsástands á Gasa. Svo fór að Hera Björk fór út fyrir Íslands hönd og mátti sæta gagnrýni vegna þessa, jafnvel þótt tónlistarmenn á borð við Bubba biðu vægðar fyrir hennar hönd.

Deild neðar

Enn á eftir að koma í ljós hvort þátttaka Íslands í Eurovision og Söngvakeppnin verði eins umdeild í ár og hún var í fyrra. Óvissan hefur samt ekki komið í veg fyrir vangaveltur gárunga um það hverjir munu koma til með að keppa í ár og ber nafn Iceguys sveitarinnar reglulega á góma.

Engan skal undra enda hefur sveitin notið fordæmalausra vinsælda undanfarna mánuði. Strákarnir seldu upp fimm Laugardalshallir í desember og ljóst að sveitin nýtur gríðarlegrar hylli, ekki síst meðal ungu kynslóðarinnar sem margir myndu fullyrða að elski Eurovision hvað mest.

„Það er af og frá að Iceguys séu að fara að taka þátt í Eurovision,“ segir Máni Pétursson umboðsmaður og eigandi Paxal í samtali við Vísi. Hann segir að það hafi ekki einu sinni komið til tals hjá strákunum. „Og mun aldrei gera það.“

Máni bætti um betur þegar hann ræddi sömu spurningu við Reykjavík síðdegis í síðasta mánuði. Við það tilefni sagði hann að Eurovision væri einfaldlega önnur deild.

„Það mun aldrei gerast að Iceguys fari í Eurovision. Viltu fá Mána á X-inu svarið við þessu? Eurovision keppnin er bara einhver önnur deild. Deild neðar. Það hefur einn listamaður frá mér farið í það og hann lenti í öðru sæti og það er það besta sem hefur komið fyrir hann og aldrei aftur. Þannig það mun ekki gerast.“