„Ekki minn stíll að vera í felu­leik með Aron“

Aðspurður um líðan sína eftir svona einhliða leik bar Snorri sig vel.

„Eins og eftir flesta örugga sigra, bara mjög vel. Ánægður með hvernig við gerðum þetta, betur meira að segja en í síðasta leik og héldum út. Ánægður með einbeitinguna og kraftinn sem við komum með í leikinn. Aðeins kannski, ég ætla ekki að segja lengi í gang, en þeir skora þarna einhver mörk og það tók okkur einhverjar mínútur að fá þetta alveg til að rúlla en bara mjög ánægður með frammistöðuna og allir sem lögðu í púkkið. Bara gott og mikilvægt fyrir mig sem þjálfara og held ég okkur sem lið að klára þetta svona.“

Aron Pálmarsson kom nokkuð óvænt inn í leikmannahópinn í kvöld en flestir höfðu reiknað með að hann yrði ekki með fyrr en í milliriðlum. Snorri gaf einfalda skýringu á því hvers vegna Aron var mættur til leiks í kvöld.

„Hann er heill heilsu, það er mjög einfalt svar við því. Auðvitað var aldrei hægt að setja einhvern fastan dag á það nákvæmlega hvenær hann yrði heill heilsu en okkur fannst bara fínt að miða við milliriðlana. Hann varð sjálfur fljótt óþolinmóður og mikill hugur í honum og ef eitthvað er þurftum við bara að halda aftur að honum. En eftir að hann byrjaði að æfa og bar sig vel og fann ekkert fyrir þessu og svo sjúkra- og læknateymið gáfu honum grænt ljós þá fannst mér bara tilvalið að gefa honum mínútur. Það er langt síðan hann hefur spilað og að vera í einhverjum feluleik með Aron bara ekki minn stíll.“

Aron spilaði reyndar ekki mikið í kvöld, eða um fimmtán mínútur.

„Hann hefði alveg getað spilað aðeins meira en mér fannst þetta einhvern veginn bara fínt móment til að fara að rúlla liðinu. Hann er reynslumikill leikmaður og einn af fáum kannski sem þarf ekkert á miklu meira að halda fyrir alvöru leiki. Á sama tíma þá er hann nýstiginn upp úr meiðslum, gleymum því ekki, og eitthvað síðan hann spilaði alvöru í leik. Í framhaldinu þá þurfum við, ég segi ekki fara sparlega með hann, en við getum ekki ofkeyrt hann.“

Snorri var sáttur með leikinn og sagði að hann hefði ekki viljað sjá neitt öðruvísi í kvöld.

„Ég held ekki. Við erum bara miklu betra lið en ég held að ég hafi komið inn á það allavega einhversstaðar að vinna og vinna er ekki alveg það sama. Ég vildi bara gera þetta vel og af sannfæringu og krafti og ég fékk það.“

Þessir fyrstu tveir leikir Íslands hafa unnist ansi sannfærandi en Ísland og Slóvenía leika úrslitaleik um efsta sætið í riðlinum á mánudagskvöld. Má segja að nú taki alvaran við.

„Auðvitað gerir það af einhverju leyti en ég nálgaðist þessa leiki af krafti og mér fannst mjög mikilvægt að sýna þessu virðingu. Við værum þannig lið að við gætum ekkert leyft okkur einhverja þvælu. Við þyrftum að sýna karakter sem strákarnir gerðu og ég er bara ánægður með það. Það segir sig sjálft að framundan eru töluvert erfiðari leikir.“