Rósa og Þór­hildur vilja stýra Mannréttindastofnun

Mannréttindastofnun Íslands tók til starfa 1. janúar 2025 og var embættið auglýst laust til umsóknar á vef Stafræns Íslands um svipað leyti.

Stjórn Mannréttindastofnunar Íslands mun skipa framkvæmdastjóra stofnunarinnar til fimm ára í senn og mun sérstök hæfnisnefnd, skipuð þremur einstaklingum, verða stjórninni til ráðgjafar um hæfni og almennt hæfi umsækjenda.

Hér fyrir neðan má sjá þá átján sem sóttu um stöðuna en auk fyrrverandi þingmannanna tveggja er þar að finna yfirmann réttindagæslumanna fatlaðs fólks, starfsmann Framsóknar, skólastjóra Ásgarðsskóla, lögreglustjóra og ýmsa aðra:

• Alfa Jóhannsdóttir, forvarnarfulltrúi
• Ársól Clara Arnardóttir, mannréttindafræðingur
• Esther Ösp Valdimarsdóttir, skólastýra Ásgarðsskóla
• Guðmundur Ásgeirsson, lögfræðingur
• Guðrún Dögg Guðmundsdóttir, sérfræðingur
• Gunnar Sær Ragnarsson, starfsmaður þingflokks Framsóknarflokksins
• Hulda Gísladóttir, mannauðsstjóri
• Jóhanna Heiðdal, framkvæmdastjóri
• Jón Þorsteinn Sigurðsson, yfirmaður réttindagæslumanna fatlaðs fólks
• Margrét María Sigurðardóttir, lögreglustjóri og fyrrverandi umboðsmaður barna
• Margrét Steinarsdóttir, framkvæmdastjóri Mannréttindaskrifstofu Íslands
• Rebekka Rán Samper. lögfræðingur og verkefnastjóri
• Rósa Björk Brynjólfsdóttir, sérfræðingur og fyrrverandi þingmaður Vinstri grænna og Samfylkingar
• Sigríður Auður Arnardóttir, lögfræðingur
• Stefán Vilbergsson, verkefnisstjóri
• Stella Samúelsdóttir, framkvæmdastýra UN Women
• Þórdís Helga Másdóttir, uppeldis- og menntunarfræðingur
• Þórhildur Sunna Ævarsdóttir, fyrrverandi alþingismaður Pírata

Nýstofnuð stofnun

Frumvarp um Mannréttindastofnun Íslands var samþykkt á Alþingi í júní í fyrra. Mannréttindastofnun starfar á vegum Alþingis en er sjálfstæð í störfum sínum og óháð fyrirmælum frá öðrum,

„Meginhlutverk hennar er að efla og vernda mannréttindi á Íslandi, eins og þau eru skilgreind í stjórnarskrá, lögum, alþjóðasamningum og öðrum alþjóðlegum skuldbindingum,“ segir í frumvarpi um stofnunina.

Helstu verkefni og ábyrgð framkvæmdastjóra Mannréttindastofnunar eru meðal annars að vinna að því að opinberir aðilar og einkaaðilar virði mannréttindi á öllum sviðum samfélagsins, annast daglega starfsemi og rekstur stofnunarinnar og hafa eftirlit með framkvæmd laga og alþjóðlegra skuldbindinga Íslands á sviði mannréttinda og eftir atvikum koma með ábendingar varðandi fullgildingu eða aðild að alþjóðlegum skuldbindingum sem eru til þess fallnar að tryggja mannréttindi.

Alþingi kýs fimm einstaklinga í stjórn Mannréttindastofnunar Íslands og jafnmarga til vara til fjögurra ára í senn. Stjórnin skipar framkvæmdastjórann og skal hann hafa lokið háskólaprófi og búa yfir þekkingu og reynslu á sviði mannréttinda. Skipa má framkvæmdastjóra að nýju til fimm ára án auglýsingar en ekki oftar.