Ís­lensku krydd­píurnar en hver er hvað?

En hvaða borgarfulltrúi er hvaða kryddpía? Á þeirri spurningu er ekkert eitt rétt svar en í þessari grein verður þó boðið upp á eitt slíkt.

Kryddpíutengingu Lífar Magneudóttur oddvita Vinstri grænna má rekja til þess að þegar þær Sanna Magdalena Mörtudóttir, oddviti Sósíalista, og Helga Þórðardóttir, oddviti Flokks fólksins, voru gripnar tali fyrir utan heimili Heiðu Bjargar Hilmisdóttir upplýsti Líf að Heiða hefði boðið upp á heimatilbúið kryddbrauð. 

Kryddbrauð sem bakarar landsins geta nú allir sem einn spreytt sig á, uppskrift að neðan.

Aðspurð um nafn á líklegan nýjan meirihluta svaraði Líf fréttamanni RÚV: „Kryddpíurnar“.

Kryddpíurnar, þær upprunalegu, stóðu á hátindi frægðar sinnar á tíunda áratug síðustu aldar þar sem lag þeirra Wannabe náði ótrúlegum vinsældum. Hljómsveitin ferðaðist um allan heim, troðfyllti íþróttahallir og valdefldu ungar konur um heim allan.

Sveitin lagði upp laupana um aldamótin en þá hafði ein þeirra verið í sambandi með hinum íslenska Fjölni Þorgeirssyni og önnur tekið saman við knattspyrnukappann David Beckham svo úr varð stórveldi Beckham-hjónanna.

Melanie C, Melanie B, Geri Hallwell, Emma Bunton og Victoria Adams. Hver hafði sín einkenni og viðurnefni, tókust á við sínar áskoranir og unnu sína sigra. Melanie C var Íþróttakryddið eða Sporty spice, Melanie B var Ógnarkryddið eða Scary spice, Geri var Rauðhærða kryddið eða Ginger spice, Victoria var Fína kryddið eða Posh spice og Emma var Barnakryddið eða Baby spice.

Íþróttakryddið

Dóra Björt er Íþróttakryddið í meirihlutaviðræðunum. Hún þótti mjög hress sem krakki, jafnvel of hress að mati kennara, en síðar kom í ljós að Píratinn brosmildi var einfaldlega með ADHD. Hún er brautryðjandi í íslenskri pólitík og náði langt ung að árum eins og Mel B sem náði heimsfrægð um tvítugt. Dóra Björt hefur deilt áhuga sínum á útivist og fann einmitt ástina hjá knattspyrnukappanum Sævari Þór Ólafssyni.

Dóra Björt hefur talað mjög fyrir réttindum kvenna eins og Mel C hefur sömuleiðis gert á ferli sínum. Þær hafa báðar verið opinskáar varðandi tímabundna baráttu við þunglyndi og lausnir í þeim málum. Svo þarf ekki að rýna neitt svakalega í andlit þeirra Dóru Bjartar og Mel C til að sjá svip með kjarnakonunum tveimur. 

Barnakryddið

Heiða Björg Hilmisdóttir er Barnakryddið og líkindin með þeim Emmu augljós sé litið til glæsilegs ljóss hárs sem einkenna þær báðar. Emma hefur verið sendiherra hjá Unicef þar sem málefni fátækra hafa verið henni ofarlega í huga. Heiða Björg hefur sem formaður velferðarnefndar oft rætt stöðu þeirra sem mega minna sín og þau verið henni hugleikin. Heiða Björg er mikil áhugakona um mat og næringu, samið uppskriftir og gefið út matreiðslubækur. Emma hefur sýrt sjónvarpsþáttum um matreiðslu og bakstur auk þess að vera tíður gestur í slíkum þáttum. Þá hefur Barnaryddið Heiða Björg notið barnaláns en þau Hrannar Björn Arnarson eiginmaður hennar eiga fjögur börn.

Ógnarkryddið

Sanna Magdalena Mörtudóttir er Ógnarkryddið. Þrátt fyrir að vera Ógnarkrydd eiga þær Mel B það ekki síst sameiginlegt að vera stuðboltar og mikil sjarmatröll, hvorug sérstaklega ógnandi. Mel B hefur rætt opinskátt um stuð og stemmningu í langferðabílum á ferðalögum Kryddpíanna á sínum tíma en Sanna er einmitt áhugakona um strætó, sem hún notar óspart og hljóp á eftir með Líf borgarfulltrúa á þriðjudag.

Sanna er yngsti borgarfulltrúi Íslandssögunnar, aðeins 26 ára þegar hún náði kjöri, og kannast því vel við snemmbúna ábyrgð og athygli eins og Mel B. sem var 19 ára þegar Spice Girls komu fram á sjónarsviðið. Þær eiga það einnig sameiginlegt að hafa gengið í skóla á Englandi því Sanna bjó í þrjú ár þar við upphaf grunnskólagöngu sinnar. 

Sanna klæðist reglulega litríkum skemmtilegum klæðnaði og Mel B. er þekkt fyrir slíkt hið sama, að vera dálítið flippuð þegar kemur að fatavali.

Rauðhærða kryddið

Helga Þórðardóttir er Rauðhærða kryddið og á ýmislegt sameiginlegt með Geri Hallwell. Bæði eru þær lágvöxnustu meðlimir grúppanna þótt það þýði alls ekki að minna heyrist í þeim en félögum þeirra enda báðar algjörir naglar. 

Þær eru reynsluboltarnir, þær elstu í grúppunni þótt yfirburðir Helgu í aldri í meirihlutaviðræðum borgarinnar eru nokkuð meiri en aldursmunur Geri og hinna kryddpíanna. Helga er fjórtán árum eldri en Heiða Björg sem er næstelst. 

Geri var sú fyrsta til að yfirgefa Spice Girls árið 1998 og Helga stefndi til að byrja með í meirihlutahjal með Framsókn, Viðreisn og Sjálfstæðisflokknum. Það átti eftir að breytast eftir samtal við formann flokksins og baklandið. Nú sér Helga ekki sólina fyrir oddvitunum á vinstri vængnum.

Fína kryddið

Líf Magneudóttir er Fína kryddið, Posh spice. Hún er búsett á Melunum í Reykjavík þar sem fasteignaverð er hvað hæst og sést reglulega í góðum gír með fræga fólkinu á Kaffi Vest. Hún hélt um tíma með Manchester United en yfirgaf Rauðu djöflanna eins og Victoria Beckham gerði ásamt eiginmanni sínum David um aldamótin. Reyndar heldur Líf með Liverpool sem Victoria myndi seint gera. Victoria var að mati sumra sísta söngkona Kryddpíanna en Líf er ófeimin með að lýsa sér sem fullkomlega laglausri. 

Athygli vakti um árið þegar Líf pirraði borgarfulltrúa Sjálfstæðisflokksins með því að ulla á þá. 

Victoria hefur einnig vakið athygli fyrir að ulla með leikkonunni Evu Longoriu. Þá var hún afdráttarlaus eftir kosningarnar 2022 að Vinstri græn yrðu ekki hluti af nýjum meirihluta en erfitt hefur einmitt reynst að fá Victoriu í endurkomu Kryddpía. Það tókst þó á endanum og nú er Líf mætt í meirihlutaviðræður. 

En það sem mestu máli skipti er sú staðreynd að borgarfulltrúarnir fimm virðast ná einkar vel saman og allt bendir til þess að nýr meirihluti verði myndaður í borginni á allra næstu dögum.