Félagið NP Innovation, stofnað árið 2011 af Nils-Åke Persson, er með höfuðstöðvar og nýsköpunarsetur í Malmö, Svíþjóð. Jafnframt er það með sölu- og þjónustu skrifstofur í Noregi og á Íslandi. Félagið gegnir lykilhlutverki í ört vaxandi hluta laxeldisiðnaðar, meðal annars uppbyggingu landeldis og stórseiðaframleiðslu.
Í tilkynningu frá IS Haf, tíu milljarða sjóður í rekstri Íslandssjóða sem fjárfestir í haftengdri starfsemi á breiðum grunni, kemur fram að NP hafi náð miklum vexti undanfarin misseri og telur fjárfestingateymi sjóðsins félagið geta náð leiðandi stöðu á heimsvísu í vatnsgæðalausnum fyrir fiskeldi. Fjárfestingin er liður í frekari innri og ytri vaxtaráformum félagsins. Vöxtur tekna félagsins hefur verið um 30 prósent að meðaltali á ári (CAGR) síðustu fjögur árin og námu heildartekjur þess um 2,3 milljörðum króna árið 2024.
Með innkomu IS Haf sem kjölfestufjárfestis, munum við enn frekar styrkja stöðu okkar á lykilmörkuðum, hraða vexti félagsins, þar sem NP getur veitt fjölbreyttara vöru- og þjónustuframboð við landeldi á heimsvísu.
Helstu viðskiptavinir eru seiðaeldi, stórseiðaeldi og áframeldi en NP selur einnig vatnshreinsilausnir til brunnbátaþjónustu, sveitarfélaga og annars iðnaðar. Viðskiptin eru gerð með fyrirvara um samþykki Samkeppniseftirlitsins á Íslandi en ekki er greint frá kaupverðinu.
Þetta er fjórða fjárfesting IS Haf frá því að sjóðurinn var settur á fót snemma árs 2023 en hann hefur áður komið að kaupum í KAPP, Thor Landeldi og norska líftæknifyrirtækinu Regenics. Helstu hluthafar framtakssjóðsins eru Útgerðarfélag Reykjavíkur, Brim og lífeyrissjóðirnir Birta, LSR og Frjálsi.
Stærsti seljandinn í viðskiptunum er Broodstock Captial, norskt fjárfestingafélag með sérhæfingu í sjávarútvegi og fiskeldi. Broodstock fjárfesti í NP árið 2018 og hefur leitt vöxt félagsins í samvinnu við Nils-Åke, stofnanda þess, og munu þeir, ásamt lykilstarfsfólki, endurfjárfesta í félaginu. Þá mun norska fjárfestingafélagið Broodstock áfram vera með mann í stjórn NP.
Michael Bäärnhielm, forstjóri NP Innovation, segir viðskiptin marka mikilvæg tímamót fyrir fyrirtækið og sé náttúrulegt næsta skref í vegferð til vaxtar. „Með innkomu IS Haf sem kjölfestufjárfestis, munum við enn frekar styrkja stöðu okkar á lykilmörkuðum, hraða vexti félagsins, þar sem NP getur veitt fjölbreyttara vöru- og þjónustuframboð við landeldi á heimsvísu.“
Kristrún Auður Viðarsdóttir, framkvæmdastjóri IS Haf-sjóðsins, bætir við að veruleg tækifæri liggi í því öfluga forskoti sem NP hefur náð í framþróun vatnsgæðalausna fyrir landeldi.
„NP hefur á afburða teymi að skipa með sérhæfða þekkingu og hefur alla burði til að vaxa hratt og verða leiðandi í lausnum og þjónustu við landeldi á heimsvísu. Kaup á NP er í samræmi við fjárfestingarstefnu IS Haf og mun aðkoma sjóðsins styðja við metnaðarfull vaxtaráform NP og verðmætasköpun og sjálfbærni í vaxandi grein landeldis.“
Þá er haft eftir Runólfi Viðari Guðmundssyni, framkvæmdastjóra Útgerðarfélags Reykjavíkur, að NP Innovation hafi víðtæka sérfræðiþekkingu og framúrskarandi lausnir sem styðja við öll stig framleiðslu í landi, frá seiðaeldi, stórseiðaeldi og áframeldis á laxi. „Meginmarkaðurinn hefur verið Noregur síðustu ár, en félagið hefur verið að stíga skref inn á nýja markaði landfræðilega og í öðrum tegundum sjávarafurða,“ segir Runólfur.
Ráðgjafar kaupanda í viðskiptunum eru Deloitte á Íslandi og í Svíþjóð og ARMA Advisory. Haavind og BBA//Fjeldco eru ráðgjafar seljenda í viðskiptunum.
Innherji greindi fyrst frá stofnun IS Haf í marsmánuði 2023 en í krafti meðfjárfestinga hluthafa og annarra fjárfesta er áætlað að fjárfestingageta sjóðsins verði á bilinu 30 til 50 milljarðar. Fjárfestingum hans verður dreift meðal fimm flokka innan haftengdrar starfsemi, allt frá útgerðum og fiskeldi yfir í hátækni, innviðauppbyggingu, markaðssetningu og sjávarlíftækni. Sjóðurinn mun fjárfesta að mestu í óskráðum félögum á Íslandi eða félögum sem hafa tengingu við Ísland.
