Dag­mar ofur­amma og heims­met­hafi: „Maður springur bara út“

Dag­mar hefur stundað kraft­lyftingar nær óslitið frá árinu 2013.

„Ég var í ballett þegar að ég var lítil stelpa en á engan íþrótta­feril að baki. Ég byrjaði á þessu árið 2013 þegar að stelpurnar mínar drógu mig upp úr sófanum og sögðu við mig: „Mamma nú kemur þú með okkur í lyftingar,“ svo hættu þær seinna meir. Önnur þeirra flutti til út­landa og hin varð ólétt. Ég bara hélt áfram.

Ég verð 73 ára þann 14.mars næstkomandi og ég held þetta sé mjög góð ákvörðun sem ég tók þarna að fara í þetta af fullum krafti. Þetta er bara skemmti­legt og svo er ég með góðan þjálfara, hann passar upp á mann. Að maður geri hlutina rétt og fer ekki með mann í ein­hverja vit­leysu.“

Hvað er það við kraft­lyftingarnar sem heillar og er svona gott?

„Ég get sagt þér að þetta er þvílík gleði og er sálar­legt líka. Maður þarf kannski ekki að fara til sál­fræðings þegar að maður er í kraft­lyftingum. Þetta er bara rosa­lega gott fyrir sál og líkama.“

Auk þess að stunda kraft­lyftingar af miklum móð er Dag­mar list­málari, góð blanda segir hún og árangur hennar í kraft­lyftingunum talar sínu.

Kom, sá og sigraði í Frakklandi

Dag­mar er nýkomin af Evrópumóti öldunga í kraft­lyftingum sem haldið var í Albi í Frakk­landi í þetta skipti. Þar átti hún frábært mót, sló sam­tals sex heims­met og er nú þre­faldur heims­met­hafi.

„Mótið var frábært. Alveg dá­sam­legt. Tvö lítil barna­börn komu með og hin tvö horfðu á héðan frá Ís­landi. Það var svo dá­sam­legt að geta gert þetta fyrir þau fannst mér. Og líka fyrir mig en ég vissi svo sem ekkert hvað ég væri að fara lyfta. Vissi ekki að ég væri að slá ein­hver met. Þjálfarinn minn segir mér bara hvað ég eigi að gera og ég gegni bara. Svona yfir­leitt alltaf. Dætur mínar höfðu látið búa til peysur sem á stóð TEAM Dag­mar og ég hafði ekki hug­mynd um það. Þau voru all-in eins og maður segir á slæmri ís­lensku.“

Bónusinn, að ná þessum heims­metum, hlýtur að vera ansi sætur?

„Já hann var mjög góður en ég vissi ekki af þessum heims­metum fyrr en seinna um kvöldið. Ég var ekkert að spá í þessu þannig, þetta var mjög skemmti­legt.“

Gleðin sem Dag­mar fær út úr því að stunda þessa íþrótt er henni mikilvægari en met.

„Það er mjög gaman ef það er árangur en ég er ekkert að pæla í þessum tölum sem ég á að lyfta, hugsa ekki út í það. Svo legg ég það heldur ekkert á minnið.“

Barnabörnin montin

Hvað segja barna­börnin þegar að þau sjá ömmu sína sem þessa krafta­konu?

„Strákurinn, 6 ára, er alltaf að máta og sýna mér vöðvana sína og láta mig sýna honum vöðvana mína. Ég held að þau séu bara mjög glöð með þetta.“

En það eru ef­laust ekki margir á 73 ára aldri sem eru að þessu?

„Ég bara veit það ekki. Ég þekki ekki marga en svo veit maður ekki. Það geta alltaf verið ein­hverjir sem stunda þetta í felum.“

„Ég ætla bara að halda áfram“

En hver er lykillinn að því að geta gert þetta á þessum aldri?

„Þú ert með góðan þjálfara. Svo borðar maður bara rétt. Ég borða allan mat fyrir utan unna mat­vöru og er ekkert sér­stak­lega að pæla í því hvað ég borða. Ég borða bara góðan mat og helst frá grunni. Svo er það kannski í genunum líka, að geta lyft þungu. En ég held að þetta komi hjá öllum. Þú byrjar með eitt­hvað létt og smám saman eykst styrkurinn. Svo gerist þetta bara.“

Maður sér það svo bersýni­lega þegar að þú ert að lyfta sem og eftir lyftu hvað það er mikil gleði í þessu.

„Maður springur bara út. Maður er svo glaður að geta gert eitt­hvað og staðið sig. Það er rosa­leg gleði sem fylgir þessu.“

Hversu lengi ætlarðu að halda þessu áfram?

„Ég ætla bara að halda áfram,“ segir Dag­mar og hlær, mikil fyrir­mynd þessi öfluga kona.