Messi var ó­á­nægður hjá PSG

Eftir að hafa verið hjá Barcelona í 21 ár gekk Messi í raðir PSG 2021. Hann lék 76 leiki fyrir liðið á tveimur árum og skoraði 32 mörk og gaf 35 stoðsendingar. Messi fór svo vestur um haf og gekk til liðs við Inter Miami fyrir tveimur árum.

Messi segir að hann hafi ekki verið hamingjusamur hjá PSG.

„Að koma til Inter Miami var tækifæri og það hvernig hlutirnir þróuðust síðasta árin mín í París, þrátt fyrir að ég hafi þurft að fara frá Barcelona, þannig að ég naut mín ekki,“ sagði Messi.

„Ég var ekki ánægður dags daglega, með æfingarnar, leikina. Ég átti erfitt með að aðlagast.“

Messi varð franskur meistari bæði árin sín hjá PSG en liðinu tókst ekki að vinna Meistaradeild Evrópu þrátt fyrir að hafa Messi, Neymar og Kylian Mbappé innan sinna raða.