Einn látinn eftir á­rekstur í Berufirði

Þetta kemur fram í tilkynningu frá lögreglunni á Austurlandi.

Þar segir að lögreglunni hafi borist tilkynning um umferðarslys á milli Djúpavogs og Breiðdalsvíkur, skammt frá bænum Krossi um 11:45. Um var að ræða árekstur tveggja ökutækja, sem óku úr gagnstæðum áttum og skullu saman. 

„Strax var ljóst að um alvarlegt slys væri um að ræða og var allt tiltækt lið lögreglu sent á staðinn, sjúkralið í Fjarðabyggð auk tækjabifreiða frá Djúpavogi og úr Fjarðabyggð,“ segir í tilkynningunni.

„Einn var úrskurðaður látinn á vettvangi en aðrir voru fluttir með þyrlum Landhelgisgæslunnar undir læknishendur á Landsspítalann í Reykjavík,“ segir einnig. 

Að sögn Hjalta Bergmar Axelssonar, aðstoðaryfirlögregluþjóns á Austurlandi, voru ferðamenn í öðrum bílnum en Íslendingar í hinum.

Rannsókn á vettvangi stendur nú yfir og segir lögreglan að búast megi við að vegurinn verði lokaður fram á kvöld. Rannsókn slyssins er á höndum rannsóknardeildar Lögreglustjórans á Austurlandi auk rannsóknarnefndar samgönguslysa.