Milljarður í af­gang í Garða­bæ

Í tilkynningu Garðabæjar til Kauphallar segir að rekstur bæjarfélagsins í fyrra hafi gengið afar vel, niðurstaðan sé umfram væntingar sveitarfélagið standi styrkum fótum fjárhagslega. Þetta sýni nýr ársreikningur Garðabæjar fyrir árið 2024 sem hafi verið lagður fram á fundi bæjarráðs í dag.

Hækkað útsvar skilar sér

„Haustið 2023 boðuðum við aðhald til varnar sterkri stöðu. Við ákváðum að sýna fyrirhyggju og ábyrgð, hagræða myndarlega í rekstri og búa samhliða í haginn til framtíðar svo hægt sé að standa vörð um þjónustu og lífsgæði allra íbúa. Þetta tókst, eins og ársreikningur fyrir árið 2024 sýnir svo glögglega,“ er haft eftir Almari Guðmundssyni, bæjarstjóra Garðabæjar.

Meðal aðhaldaðgerða sem Almar vísar til var nokkuð myndarleg hækkun á útsvari, líkt og fjallað var um á sínum tíma.

Margfalt meiri afgangur A-hluta en reiknað var með

Í tilkynningu segir að rekstrarniðurstaðan hafi verið jákvæð um 559 milljónir króna fyrir A-hluta og 1.183 milljónir króna fyrir heildarrekstur bæjarins, en útkomuspá samkvæmt fjárhagsáætlun 2024 hafi gert ráð fyrir um 94 milljóna króna rekstrarafgangi í A- hluta og 474 milljóna í í samstæðu. 

Rekstrartekjur hafi verið 30,48 milljarðar króna en áætlun hafi gert ráð fyrir 29,407 milljörðum króna. Rekstrargjöld hafi numið samtals 25,245 milljörðum króna en áætlun hafi gert ráð fyrir 25,336 milljörðum króna, sem sé um 0,4 prósenta frávik. 

Eigið fé sveitarfélagsins í árslok 2024 hafi numið 28,671 milljörðum króna samkvæmt efnahagsreikningi. Veltufé frá rekstri hafi numið 2,331 milljörðum króna og hækkað verulega á milli ára.

„Grunnrekstur sveitarfélagsins styrktist verulega, eins og við lögðum upp með í áætlun. Við sjáum það á sterku sjóðsstreymi og afkomu fyrir fjármagnsliði. Önnur staðfesting þess er að skuldir A-sjóðs lækka um 2 ma.kr. á milli ára. Þótt verðbólga og vextir hafi enn neikvæð áhrif á fjármagnsliði, sáum við jákvæða breytingu á milli fyrri ára og síðari hluta ársins,“ er haft eftir Almari.

Íbúum fjölgaði

Garðabær hafi vaxið jafnt og þétt undanfarin ár. Nú sé íbúafjöldinn kominn yfir 20 þúsund og íbúum hafi fjölgað um ríflega 5 prósent á síðasta ári, eða um eitt þúsund manns. Traust fjárhagsstaða sé undirstaða þess að Garðabær sé vel undir það búinn að mæta þjónustu við fjölgun nýrra íbúa samhliða uppbyggingu nýrra hverfa.

„Við ætlum okkur að halda áfram að mæta kröfum um framúrskarandi þjónustu,“ er haft eftir Almari.

Alls hafi framkvæmdir ársins numið 6,806 milljörðum króna, sem sé 231 milljón króna undir áætlun ársins. Tekin hafi verið langtímalán að fjárhæð 4,924 milljörðum króna til að standa undir framkvæmdum, en jafnframt hafi verið greidd niður langtímalán að fjárhæð 1,643 milljörðum króna.​ Helsta framkvæmd ársins hafi verið bygging Urriðaholtsskóla. Til byggingar annars áfanga skólans hafi1,115 milljarði króna verið varið og til þriðja áfanga 657 milljónum króna eða samtals 1,772 milljörðum króna. Einnig hafi verið framkvæmt í öðrum skólabyggingum og lóðum fyrir um 892 milljónir króna auk fjölmargra annarra verkefna.

„Það er nauðsynlegt að leggja áfram áherslu á ábyrgan rekstur og sýna fyrirhyggju á grunni góðs rekstrar ársins 2024. Við vitum að rekstrarumhverfi sveitarfélaga er mjög krefjandi núna. Verðbólga og háir vextir hafa enn mikil áhrif og öll sveitarfélög eru að laga rekstur sinn að launahækkunum. Íbúar Garðabæjar geta treyst því að við höldum áfram að gæta hagsmuna þeirra með því að veita þeim góða þjónustu og standa vel að rekstrinum“ er haft eftir Almari.