„Ég er alltaf stressuð“

Tinna Guðrún  skoraði 49 stig í tveimur síðustu leikjum einvígis Hauka og Grindavíkur í átta liða úrslitum Bónus deildar kvenna í körfubolta og átti mikinn þátt í því að Haukakonur grófu sig upp úr 0-2 holu og unnu einvígið 3-2.

Hörður Unnsteinsson og sérfræðingar hans í Bónus Körfuboltakvöldi, Pálína Gunnlaugsdóttir og Helena Sverrisdóttir, fengu Tinnu Guðrún í heimsókn til sín á háborðið eftir sigur Haukakvenna í oddaleiknum í gær.

„Hingað í settið er komin til okkar Tinna Guðrún Alexandersdóttir sem er að öðrum ólöstuðum búin að vera besti leikmaðurinn í þessari seríu. Til hamingju með sigurinn en hvernig er svona tilfinningin rétt eftir leik,“ spurði Hörður.

Ég er ótrúlega sátt

„Bara ótrúlega góð. Ég er bara ótrúlega ánægð með að við náðum að mæta svona sterkt inn í þennan leik því mér finnst við ekki hafa náð því í síðustu leikjum. Ég er ótrúlega sátt,“ sagði Tinna Guðrún.

Hún er á því að þetta hafi verið besti leikur Hauka í einvíginu.

„Já langbesti. Ég ætla samt að hrósa Grindavíkurliðinu því mér fannst þær mæta ótrúlega flottar inn í þessa seríu. Við náðum ekki að mæta ákefðinni sem þær voru með,“ sagði Tinna.

„Við vorum að leyfa þeim að ýta okkur út úr því sem við vorum að reyna að gera. Þær brutu pressuna okkar mjög auðveldlega og við náðum einhvern veginn ekki að komast á strik í okkar varnarleik sérstaklega,“ sagði Tinna en var farið að fara um hana?

„Maður er náttúrulega drullustressaður að lenda 2-0 undir. Ég er alltaf stressuð,“ sagði Tinna.

Bara að vera ógeðslega ákveðin

Sérfræðingurinn Pálina Gunnlaugsdóttir vildi fá að vita hvernig Tinna undirbjó sig fyrir þriðja leikinn þegar Haukarnir voru einu tapi frá sumarfrí.

„Ég undirbjó mig eins. Ég fór bara betur yfir það sem við ætluðum að gera og svo er þetta bara að vera ógeðslega ákveðin. Maður verður að ákveða að maður ætli að mæta til að fara í öll fráköst og að fara í alla lausa bolta. Við náðum að gera það í kvöld,“ sagði Tinna.

Það má sjá allt spjallið við Tinnu hér fyrir ofan.