Saka Ingu um metnaðar­leysi eftir skipun flokks­manna í stjórn

Ráðherra skipaði nýja stjórn um miðjan mars. Þar skipti hún fyrri stjórn út á einu bretti og setti fimm nýja menn í staðinn. Fjórir af fimm hafa tengsl við Flokk fólksins en sá fimmti er framkvæmdastjóri Sambands íslenskra sveitarfélaga og skipaður af sambandinu.

Verkfræðingafélagið telur að nýskipuð stjórn uppfylli ekki þau lögbundnu skilyrði sem gerð séu með viðunandi hætti. Enginn stjórnarmaður búi yfir sérfræðikunnáttu á sviði mannvirkjagerðar og einungis einn stjórnarmaður hafi tengingu við byggingariðnaðinn - sem húsasmíðameistari og fasteignasali.

„Skipan stjórnar HMS er ekki einungis vanvirðing við þá sérfræðimenntun og fagþekkingu sem tæknimenntað fólk býr yfir heldur ógnar jafnframt faglegri ákvarðanatöku innan stofnunar sem hefur víðtæk áhrif á öryggi, gæði og sjálfbærni í byggðu umhverfi. Með því að hunsa þessa þekkingu er verið sýna skilnings- og skeytingarleysi gagnvart afar mikilvægum málaflokki þar sem verkefnið er að tryggja gæði bygginga, uppræta byggingagalla sem eru viðvarandi vandamál, styðja við byggingarannsóknir og gæta hagsmuna húseigenda á margvíslegan máta,“ segir í bréfinu VFÍ.

Það sé mat Verkfræðingafélagsins að þessi skipan endurspegli alvarlegt metnaðarleysi í garð málaflokksins, á tímum þar sem brýnt er að takast á við stórar áskoranir í mannvirkjagerð.

„Í þessu samhengi skal minnt á fyrri ákvarðanir stjórnvalda sem haft hafa neikvæð áhrif á faglega umgjörð mannvirkjagerðar, svo sem þegar Rannsóknarstofnun byggingariðnaðarins var lögð niður. Þá er rétt að nefna að á undanförnum árum eru mörg dæmi um að stjórnendur mikilvægra innviðastofnana sem byggja á verkfræðilegri sérþekkingu hafi verið skipaðir án nokkurrar sérfræðiþekkingar á viðkomandi sviði,“ segir í bréfinu til Ingu.

Sigurður Tyrfingsson er formaður nýju stjórnarinnar. Hann var í þriðja sæti á lista Flokks fólksins í síðustu þingkosningum. Jónas Yngvi Ásgrímsson og Rúnar Sigurjónsson hafa verið á lista flokksins fyrir þingkosningar. Þá er Oddný Árnadóttir fulltrúi Flokks fólksins í stjórn Byggðastofnunar.

„Skipan nýrrar stjórnar HMS er því miður enn eitt dæmið um stefnu þar sem fagþekking verkfræðinga, tæknifræðinga og annars tæknimenntaðs fólks er virt að vettugi. Þetta sýnir alvarlegt skilningsleysi stjórnmálafólks á mikilvægi sérfræðimenntunar og djúprar fagþekkingar og hætt er við að það muni hafa afdrifaríkar afleiðingar fyrir þróun og gæði mannvirkja á Íslandi um langa framtíð,“ segir Verkfræðingafélagið.

Athygli vakti í febrúar þegar Daði Már Kristófersson fjármálaráðherra skipaði í valnefndir sem hafa þann tilgang að velja fólk í stjórnir stærstu fyrirtækja í eigu ríkisins. Með þeim vildi Daði rjúfa þá hefð sem skipast hefði að velja í embætti eftir pólitískum línum. Frekar ætti að velja hæfasta fólkið hverju sinni.

Fyrri stjórn ekki laus við pólitískar tengingar

Fyrri stjórn HMS skipuðu þau Sigurjón Örn Þórsson formaður, Herdís Sæmundardóttir varaformaður, Björn Gíslason, Elín Oddný Sigurðar dóttir og Jón Björn Hákonarson sem tilnefndur var af Sambandi íslenskra sveitarfélaga. 

Ekki voru þau laus við pólitískar tengingar þótt meiri fjölbreytni hafi verið að finna sé litið til tengsla þeirra við stjórnmálaflokka. Þannig eiga Sigurjón Örn, Herdís og Jón Björn sér sögu innan Framsóknarflokksins, Björn er borgarfulltrúi Sjálfstæðisflokksins og Elín Oddný fyrrverandi varaborgarfulltrúi Vinstri grænna til margra ára. Jón Björn var skipaður af Sambandi íslenskra sveitarfélaga.