Íris Svava og Arn­þór selja fal­lega í­búð á besta stað

„Besta Skipasundið okkur, fyrir og eftir. Ef ég gæti smíðað auka herbergi fyrir lil queen myndi ég gera það, en það er ekki hægt. Þannig þessi sæta besta er komin á sölu. Fullkomin fyri fyrstu kaupendur,“ skrifar Íris Svava og deilir myndbandi af íbúðinni áður en þau fluttu inn og eins og hún lítur út í dag.

Hér má sjá myndbandið:

Gyllt smáatriði og fagurfræði

Um er að ræða 57 fermetra íbúð í fjögurra íbúða húsi sem byggt var árið 1949. Íbúðin er með aukinni lofthæð og gluggum á þrjá vegu sem skapa opið og bjart yfirbragð.

Gengið er upp tröppur inn um sameiginlegan inngang og þaðan inn í anddyri íbúðarinnar, sem tengir saman önnur rými. Stofa og borðstofa eru samliggjandi í rúmgóðu og björtu rými með útgengi á svalir til suðurs. Á gólfum er ljóst harðparket.

Eldhúsið er stúkað af og skartar viðarinnréttingu sem hefur verið máluð fölbleikum lit og skreytt gylltum höldum. Á gólfi er dúkur með marmaramynstri.

Baðherbergið hefur nýlega verið endurnýjað á smekklegan hátt. Þar mætast gyllt blöndunartæki, ljósar flísar á gólfi og að hluta á veggjum, ásamt grænmáluðum veggjum og skapa fallega heildarmynd.

Svefnherbergið er bjart og rúmgott með innbyggðum fataskápum.

Nánari upplýsingar á fasteignavef Vísis.