Eitt merki­legasta verk 21. aldarinnar á Ís­landi

Marclay mætti til landsins í lok apríl og var viðstaddur opnun sýningarinnar 2. maí síðastliðinn.

Í Reykjavík og New York

Í fréttatilkynningu segir: 

„Verkið The Clock er epískt, sólarhringslangt vídeóverk á einni rás með hljóði. The Clock hlaut Gullna ljónið á Feneyjatvíæringnum árið 2011 og er almennt talið eitt merkasta listaverk 21. aldarinnar. Verkið er bæði djúpstæð hugleiðing um tímann og virðingarvottur við sögu kvikmyndalistarinnar.“

Verkið hefur verið til sýnis víðs vegar um heim og er þar á meðal núna á dagskrá eins stærsta nútímalistasafns heims, MoMA í New York. Það er klippt saman úr mörg þúsund myndbrotum, ýmist svart hvítum eða í lit, sem Marclay safnaði á þriggja ára tímabili. 

„Hvert myndbrot skírskotar til ákveðinnar tímasetningar, hvort sem er í gegnum samtal eða með vísun í tímamæli, klukku, úr, stundaglas, sólúr eða blikkandi útvarpsvekjara sem í réttri tímaröð spannar heilan sólarhring, mínútu fyrir mínútu.“ 

„Epísk frásögn um mannlegt athæfi“

Vídeóið er stillt á staðartíma og er því sjálft tímamælir. Í The Clock er einnig hljóðmynd eftir Marclay þar sem hann notast við hrynjanda hljóða og tónlistar til að fylgjast með því hvað tímanum líður.

„Þau ótal augnablik sem skeytt er saman í verkinu mynda ekki heildræna frásögn. Þess í stað skapast nánast súrrealísk hughrif á meðan við fylgjumst með þeim atburðum sem eiga sér stað á þessum sólarhring. 

Segja má að The Clock sé epísk frásögn um mannlegt athæfi, framkölluð í gegnum linsu kvikmyndavélarinnar. Þetta er frásögn um þær sameiginlegu hversdagsathafnir okkar sem óhjákvæmilega leiða til tilviljanakenndra samfunda og óvæntra uppákoma,“ segir að sama skapi í fréttatilkynningu frá Listasafni Íslands.

Það var líf og fjör á opnun sýningarinnar en hér má sjá vel valdar myndir frá henni: 

Á Listasafni Íslands eru tvær sólarhringslangar sýningar á The Clock. Sú fyrsta var á opnunarkvöldi sýningarinnar og næsta verður á sumarsólstöðum 22. júní og verður það jafnframt síðasti sýningardagurinn.