Ráðu­neytið ræður fjögur ís­lensk fjár­mála­fyrir­tæki vegna sölunnar á Ís­lands­banka

Þetta kemur fram í tilkynningu frá ráðuneytinu, en í síðustu viku samþykkti Alþingi breytingar á lögum um ráðstöfun eignarhluta ríkisins í Íslandsbanka. Lögin eiga að tryggja að við framkvæmd útboðsferlis vegna sölu á hlutum ríkisins í bankanum verði viðhöfð „hlutlægni, hagkvæmni, jafnræði og gagnsæi,“ líkt og það er orðað í tilkynningunni. Þá verði mikil áhersla lögð á að ferlið í heild sinni njóti trausts.

Sjá einnig: Salan á Íslandsbanka: Samið við fjóra erlenda söluaðila

Fjármálafyrirtækin fjögur munu ásamt þeim erlendu gegna hlutverki söluaðila í fyrirhuguðu útboði og er ráðning söluaðilanna hluti af undirbúningsvinnu sem nú er sögð langt á leið komin.

„Umsjónaraðilar útboðsins verða eins og áður hefur verið tilkynnt Barclays Bank Ireland PLC, Citigroup Global Markets Europe AG og Kvika banki hf. sem jafnframt verða söluaðilar ásamt því að annast skipulagningu og yfirumsjón útboðsins auk utanumhalds tilboðsbóka,” segir ennfremur í tilkynningunni frá ráðuneytinu sem birt var á vef stjórnarráðsins í dag.