Þakkantinum var haldið saman með kúst­skafti

Reglulega berast fréttir af göllum líkt og lekavandræðum í nýbyggingum. Húsnæðis- og mannvirkjastofnun segir núverandi eftirlitskerfi fullreynt og kynnti í dag nýjan vegvísi um eftirlit með byggingariðnaði. Lagt er til að byggingareftirlit færist frá byggingarfulltrúum sveitarfélaga til fagaðila undir hatti óháðra skoðunarstofa. 

Réttur tryggður með nýrri tryggingu

Þórunn Sigurðardóttir framkvæmdastjóri sviðs mannvirkja- og sjálfbærni hjá stofnuninni segir vonir standa til að fréttir af lekum húsum geti með þessum breytingum heyrt sögunni til. „Við vonumst til þess að í breyttu eftirltii muni rísa hér fleiri betri mannvirki og að stjórnsýslan verði skilvirkari og að neytendavernd verði stóraukin.“

Auk þess er lagt til að sérstök byggingartrygging verði tekin upp í stað núverandi starfsábyrgðatryggingar. Hún gildi í tíu ár eftir að íbúð er tekin í notkun.

„Þannig ef upp koma gallar þá sitji neytendur ekki uppi með tjónið, þeir geti leitað aðstoðar hjá tryggingafélaginu en þurfi ekki sjálfir að fara í dómsmál.“

Þorgils Jónsson er einn þeirra sem höfða hefur þurft slíkt dómsmál eftir að hús sem hann keypti reyndist ónýtt vegna myglu. Hann fékk engar bætur og segist hann vona að breytingarnar verði til þess að fleiri þurfi ekki að sitja í sömu sporum. Þorgils mætti með kústskaft á fund HMS í dag. 

„Þegar húsið mitt var tekið í sundur, það var byggt af snillingum, þá kom í ljós að í þakkantinum hafði verið notað kústskaft til að halda þakkantinum saman, eins og sagt í dómsmálinu mínu engu til sparað einungis besta efnið notað, þannig þetta kom í ljós þegar við fórum í að rífa húsið í sundur sem eyðilagðist. Þetta er bara, ég veit ekki hvað ég get sagt, þetta eru bara ótrúleg vinnubrögð.“