Ís­lenskt mark, sjálfs­mark og rautt spjald

Lærisveinar Freys Alexanderssonar misstu af stigum í toppbaráttu deildarinnar þegar þeir gerðu 2-2 jafntefli við Sarpsborg, þar sem jöfnunarmark gestanna kom á fimmtu mínútu uppbótartíma.

Eggert hafði komið Brann í 1-0 strax á fjórðu mínútu leiksins og Brann komst aftur yfir, 2-1, á 59. mínútu. Skömmu síðar kom Sveinn Aron Guðjohnsen inn á hjá Sarpsborg sem freistaði þess að ná inn jöfnunarmarki og tókst það á síðustu stundu.

Brann er því í 3. sæti með 17 stig en leik til góða á topplið Viking sem er með 20 stig, eftir 3-1 sigur á Sandefjord sem missti Stefán Inga af velli með rautt spjald í lokin. Vítaspyrna var þá einnig dæmd sem Viking skoraði úr og innsiglaði sigurinn. Hilmir Rafn Mikaelsson var á varamannabekknum hjá Viking.

Ísak Snær Þorvaldsson var einnig á bekknum hjá Rosenborg sem vann 1-0 gegn botnliði Haugesund og er í 2. sæti deildarinnar, stigi fyrir ofan Brann.

Strömsgodset er í 12. sæti með sex stig úr sjö leikjum, eftir 2-0 tap á heimavelli gegn Bryne. Seinna markið var sjálfsmark Loga Tómassonar sem samkvæmt textalýsingu Nettavisen frá leiknum var óheppinn þegar hann skallaði boltann í eigið net.