Willum nýr for­seti ÍSÍ með al­gjörum yfir­burðum

Willum tekur við af Lárusi Blöndal sem verið hefur forseti ÍSÍ frá árinu 2013, þegar hann tók við embættinu eftir andlát Ólafs Rafnssonar.

Auk Willums voru í framboði þau Brynjar Karl Sigurðsson, Magnús Ragnarsson, Olga Bjarnadóttir og Valdimar Leó Friðriksson.

Willum hlaut 109 af 145 greiddum atkvæðum. Olga kom næst með 20 atkvæði, Magnús hlaut 9, Valdimar 3 en Brynjar Karl ekkert.

Willum er kjörinn til næstu fjögurra ára.

Þetta var í fyrsta sinn í tæp tuttugu ár sem kosið var um forseta ÍSÍ og framboðin hafa aldrei verið fleiri.

Frambjóðendurnir fimm börðust um 146 atkvæði (greidd atkvæði voru á endanum 145) en þingfulltrúar skiptast að mestu í tvo 72 manna hópa. Annar frá sérsamböndunum, allt frá því minnsta, Keilusambandinu KLÍ sem fær einn fulltrúa, og yfir í það stærsta, Knattspyrnusambandið KSÍ sem fær sex fulltrúa. Hinn hópurinn er skipaður íþróttahéruðunum en þar er Ungmennasamband Kjalarnesþings, UMSK með 16 fulltrúa og Íþróttabandalag Reykjavíkur, ÍBR með 19 fulltrúa í yfirburðarstöðu miðað við nítján sambönd sem eiga aðeins einn fulltrúa. Við þessa tvo hópa bætast svo tveir fulltrúar úr íþróttamannanefnd ÍSÍ.

Sjö nýir fulltrúar voru einnig kjörnir inn í framkvæmdastjórn ÍSÍ í dag. Þau voru, í stafrófsröð: 

• Heimir Örn Árnason
• Kári Mímisson
• Sigurjón Sigurðsson
• Trausti Gylfason
• Viðar Garðarsson
• Þórdís Anna Gylfadóttir
• Þórey Edda Elísdóttir

Fyrir í framkvæmdastjórn eru:

• Daníel Jakobsson
• Elsa Nielsen
• Hafsteinn Pálsson
• Hjördís Guðmundsdóttir
• Kolbrún Hrund Sigurgeirsdóttir
• Ragnheiður Ríkharðsdóttir
• Olga Bjarnadóttir